Nag-anunsyo ng bahagyang pagbaba sa singil ng kuryente ang Manila Electric Company (Meralco) ngayong Lunes, Agosto 10, 2026.
Ayon kay Meralco Vice President at Corporate Communications Head Joe Zaldarriaga, may bawas na P0.0428 per kWh ngayong Agosto, kung saan ang kabuuang rate ay pumalo na lang sa P14.7833 mula sa P14.8261 per kWh noong Hulyo.
Nangangahulugan ito ng humigit-kumulang P9 na bawas sa bill ng mga residential customer na nakakagamit ng 200 kWh.
Ang bawas-singil ay resulta ng inaprubahan ng Energy Regulatory Commission (ERC) na P9.5 bilyong refund (AWAT Refund) na ipatutupad sa loob ng anim na buwan.
Gayunpaman, binigyang-diin ng Meralco na mas malaki sana ang ibababa ng singil kung hindi lamang tumaas ang iba pang pass-through costs tulad ng transmission charges ng National Grid Corporation of the Philippines (NGCP) at karagdagang buwis dahil sa paggamit ng mas mahal na alternatibong gasolina habang naka-maintenance shutdown ang Malampaya facility.
Kasabay nito, tiniyak ng Meralco na nakatutok ang kani-kanilang mga crew 24/7 upang agad na maibalik ang supply ng kuryente sa mga lugar na naapektuhan ng malalakas na pag-ulan at pagbaha dala ng Habagat.
Nagpaalala rin ang ahensya sa publiko na tiyaking ligtas ang mga linya at kagamitang pangkuryente at iwasang humawak sa mga basang switch at submerged facilities para makaiwas sa aksidente.
About the Author
