Umabot na sa mahigit 523,000 na indibidwal ang lumagda sa online petitions na tumututol sa kontrobersyal na “Pax Silica” project sa pagitan ng administrasyong Marcos at ng United States, ayon sa advocacy groups na nangakong lalo pang paigtingin ang public pressure laban sa inisyatiba.
Sa isang press conference nitong Huwebes, inihayag ng International League of Peoples’ Struggle (ILPS) Philippines, Katipunan Student Movement ng Bulacan State University (Kasama BulSU), at ni Tony Oquias na nakakalap ang kanilang magkakahiwalay na petisyon ng kabuuang 523,265 na lagda.
Ayon kay Arnold Padilla, secretary general ng ILPS Philippines, ang malawakang suportang natatanggap ng mga petisyon ay nagpapakita ng matinding pagtutol ng mamamayan sa proyekto. Binigyang-diin niya ang mga usapin ukol sa kawalan ng transparency sa negosasyon, pagpapalayas sa mga lokal na komunidad, pagsira at pagkuha sa mga likas na yaman, at ang paglabag sa pambansang soberanya.
Ayon sa Kasama BulSU, nakakolekta ang kanilang Change.org petition ng 386,712 lagda. Ipinahayag ni Selwyn Angelone Almeida, secretary general ng grupo, ang kanilang pangamba sa epekto ng mega project sa kinabukasan ng kabataan kung ipapasakamay sa mga dayuhan ang lupain at likas na yaman ng bansa.
Samantala, nakakuha naman ng 20,675 na lagda ang Google Forms petition ng ILPS Philippines, bukod pa sa suporta mula sa 154 organisasyon sa 30 bansa. Ang hiwalay na Change.org petition naman ng pribadong mamamayan na si Tony Oquias ay nakalap ng 115,878 na lagda.
Pinag-aaralan na ng mga grupo ang pagsasama-sama ng kanilang mga hakbang, kabilang ang pagpasa ng mga nakalap na lagda sa Kongreso upang hilingin ang isang imbestigasyon ukol sa proyekto.
Sa kabilang banda, nagpahayag naman ng suporta ang Management Association of the Philippines (MAP) sa panukalang 1,619-ektaryang Philippines-US Pax Silica hub.
Ayon sa MAP, isa ito sa pinakamahalagang oportunidad sa pag-unlad ng ekonomiya ng bansa sa mga nakalipas na dekada, ngunit binigyang-diin ng grupo na dapat tiyakin ng pamahalaan na magsisilbi ito sa pambansang interes at magdadala ng tunay na kapakinabangan para sa mga Pilipino.
About the Author
