Humaharap sa matinding dagok ang popularidad ni Pangulong Ferdinand Marcos Jr. matapos bumagsak ang kanyang trust rating sa negative 3 percent, ayon sa pinakabagong survey ng Social Weather Stations (SWS) na kinomisyon ng Stratbase Consultancy.
Batay sa survey, bumagsak ng 10 puntos ang trust rating ni Marcos mula +7 percent noong Setyembre. Ang kasalukuyang marka ng Pangulo ay halos kapareho ng antas ng tiwala sa kanya noong Marso hanggang Mayo, kasagsagan ng halalan, kasunod ng impeachment ni Duterte at pagkakadetine ni dating Pangulong Rodrigo Duterte sa International Criminal Court (ICC) sa The Hague, Netherlands.
Ipinakita rin ng datos ng SWS na naitala ni Marcos ang kanyang pinakamababang trust rating noong Abril sa -4 percent, bago muling umangat sa +18 percent noong Hunyo.
Isinagawa ang survey mula Nobyembre 24 hanggang 30, wala pang dalawang linggo matapos iugnay ni dating AKO BICOL Party-list Rep. Zaldy Co ang Pangulo sa umano’y ₱100-bilyong budget insertion sa 2025 national budget.
Sa breakdown ayon sa rehiyon, nakapagtala si Marcos ng negative trust ratings sa Metro Manila (-8%), Visayas (-7%), at lalo na sa Mindanao (-37%). Tanging sa Balance Luzon siya nagtala ng positibong marka na +18 percent, bagama’t mas mababa ito ng apat na puntos kumpara noong Setyembre.
Samantala, tumaas ang trust rating ni Vice President Sara Duterte sa +31 percent, mula +25 percent noong Setyembre.
Pinakamataas ang marka ng Bise Presidente sa kanyang balwarte na Mindanao sa +74 percent, sinundan ng Visayas sa +43 percent. Sa Balance Luzon, umangat din ang kanyang trust rating ng walong puntos, habang bahagyang bumaba ng apat na puntos ang kanyang marka sa Metro Manila.
Ayon sa SWS, 1,200 respondents ang lumahok sa survey na may ±3 percent national margin of error.
About the Author
