Maituturing na isang “rollercoaster” na gabi ang unang tikim ni Victor Wembanyama sa NBA Finals matapos nakawin ng New York Knicks ang home-court advantage ng San Antonio Spurs sa kanilang 105-95 panalo sa Game 1.
“I was bad tonight. It’s not more complicated than that,” simpleng pahayag ni Wembanyama na kalmado at walang bakas ng panic. “Never in the finals, obviously. But I’m not kicking myself about anything really. I’m not worried the slightest.”
BASAHIN: Arespacochaga, absent muna sa Game 1 at 2 ng PBA Finals dahil sa Gilas girls
Bago magsimula ang laro, biniyayaan pa ng mga madre si Wembanyama at nakakuha ng pinakamalakas na hiyawan mula sa mga manonood nang ianunsyo ang mga starting line-up. Ngunit naging mapait ang pagtatapos nito para sa French star at sa Spurs.
Bagamat nagtala ng 26 puntos sa kanyang finals debut, nahirapan ang pambato ng Spurs laban sa dumaranas na depensa ng New York. Kumonekta lamang si Wembanyama sa 6-of-21 shooting mula sa field, kung saan ang ilang tira nito ay tumama pa sa itaas na bahagi ng backboard.
Lalo pang naging masakit para sa tinaguriang pinakamagaling na defensive player ng liga nang ratsadahan sila ng Knicks ng nagbabagang 11-0 run sa huling bahagi ng final quarter upang selyuhan ang laban.
Hindi naman nababahala si Spurs coach Mitch Johnson sa naging laro ng kanyang pamilyar na bentahe.
“I would say that he definitely holds himself accountable. I expect he’ll learn a lot of things from tonight’s game and come out with a good approach in Game 2,” ani Johnson.
BASAHIN: Lams Lamina, napiling No. 1 overall pick ng Galeries Tower sa 2026 PVL Rookie Draft
May kasaysayan na ang Spurs sa pagbangon mula sa pagkatalo sa Game 1. Sa katunayan, nalusutan nila ang Portland sa Round 1, ang Minnesota sa Round 2, at ang Oklahoma City sa Western Conference finals matapos mabaon sa serye.
Gayunpaman, mabigat na hamon ang kanilang kakaharapin laban sa Knicks na hindi pa natatalo simula noong Abril at kasalukuyang may 12-game winning streak.
Bago magsimula ang bakbakan, pinuri pa ni NBA Commissioner Adam Silver si Wembanyama sa pagiging ehemplo nito sa liga at sa paglampas sa inaasahan ng marami simula nang pumasok ito sa NBA tatlong taon na ang nakararaan—kabilang na ang pagsubok sa kalusugan nito noong nakaraang taon dahil sa deep vein thrombosis.
“Did I have a specific expectation in terms of numbers of years it would take him to get to the finals? No. But I would say… he’s ahead of any timeline that people had in mind,” pahayag ni Silver.
Buo naman ang suporta ng kakampi nitong si Dylan Harper na naniniwalang reresponde ang kanilang pamilyar na big man sa susunod na tapatan.
“We’re all confident. He never backs down from the moment. He always kind of steps up and meets it,” ani Harper.
Nakatakdang bumawi si Wembanyama at ang Spurs sa gaganaping Game 2 ngayong Biyernes. (RON TOLENTINO)
About the Author
