Isang panukalang batas ang inihain sa Mababang Kapulungan ng Kongreso na naglalayong itaas mula P2,000 patungong P5,000 ang buwanang Personnel Economic Relief Allowance (PERA) ng mga kawani ng pamahalaan upang matulungan silang makasabay sa patuloy na pagtaas ng presyo ng mga bilihin.
Sa ilalim ng House Bill 9475 na inihain ni Parañaque City Representative Brian Yamsuan, binigyang-diin nito na 17 taon nang nakapako sa P2,000 ang buwanang PERA ng mga empleyado ng gobyerno sa kabila ng krisis sa ekonomiya, global supply disruptions, at malawakang implasyon sa nakalipas na dalawang dekada.
Ayon kay Yamsuan, labis na naapektuhan ng pagtaas ng presyo ng pagkain, kuryente, pamasahe, at iba pang pang-araw-araw na gastusin ang mga ordinaryong kawani tulad ng mga public school teachers, public health workers, mga klerk, at maintenance personnel.
“Ilan sa mga matinding naapektuhan… ay ang ating mga public school teachers, public health workers, clerks at ‘yung mga maintenance personnel na mababa ang sahod. Patuloy na lumiliit ang value ng kanilang kita dahil sa inflation,” ani Yamsuan.
Idinagdag pa ng mambabatas na kung ikukumpara noong nakalipas na 17 taon, bumagsak na ng higit sa 75 porsyento ang purchasing power o tunay na halaga ng piso, kaya naman hindi na sapat ang kasalukuyang natatanggap ng mga empleyado upang makapamuhay nang marangal ang kanilang pamilya.
Sakaling maipasa, ang P5,000 buwanang PERA ay ipagkakaloob sa lahat ng civilian personnel sa pambansa at lokal na pamahalaan—maging sila ay appointive o elective, at nasa regular, contractual, o casual na posisyon na sakop ng Compensation and Position Classification Act (RA 6758).
Makinabang din sa ulat na ito ang mga miyembro ng militar at iba pang uniformed personnel tulad ng mga pulis at sundalo. Gayunman, hindi kasama sa panukala ang mga kawani ng gobyerno na nakatalaga sa ibang bansa na kasalukuyan nang tumatanggap ng overseas allowance.
Para sa unang taon ng pagpapatupad, ang kakailanganing pondo ay kukunin mula sa mga natipid o savings ng pamahalaan, kabilang ang mga unreleased at programmed appropriations. Para naman sa mga susunod na taon, ang pondo para sa ulat na ito ay pormal nang isasama sa taunang General Appropriations Act (GAA) o ang pambansang badyet.
Ang PERA ay unang ipinakilala noong 1991 sa ilalim ng Budget Circular 4 na nagbibigay ng P500 kada buwan sa mga kuwalipikadong kawani, bago ito huling itinaas sa P2,000 noong taong 2009.
About the Author
