Nakiisa ang Association of Philippine Journalists-Samahang Plaridel Foundation Inc. sa buong bansa sa pagbibigay-pugay sa mga pambansang bayani, kabilang ang “Ama ng Pamamahayag sa Pilipinas” na si Marcelo H. Del Pilar, noong Linggo, Agosto 30.
Pinangunahan nina Samahang Plaridel Chairman Rolando G. Estabillo at President Evelyn Quiroz ang isang simpleng seremonya ng pag-aalay ng bulaklak sa bantayog ni Del Pilar na matatagpuan sa kanto ng M.H. del Pilar St. at Pres. Quirino Ave. sa Maynila, tapat ng Ospital ng Maynila.
Naganap ang naturang alay-bulaklak ganap na 9:00 ng umaga bilang paggunita sa ika-176 na kaarawan ng bayaning mas kilala sa kanyang ngalang-panulat na “Plaridel.” Inanyayahan din sa naturang kaganapan ang mga lokal na opisyal ng pamahalaan.
“Inaanyayahan namin ang lahat ng aming mga kaibigan sa industriya ng pahayagan, lalo na ang mga kasapi ng Samahang Plaridel, na makibalikat sa ating pagbibigay-pugay kay Del Pilar at sa lahat ng ating mga pambansang bayani sa natatanging araw na ito,” pahayag ni Estabillo.
Binigyang-diin naman ni Quiroz na taun-taon nilang pinararangalan si Del Pilar tuwing kanyang kaarawan (Agosto 30) at araw ng kamatayan (Hulyo 4) bilang pagkilala sa mahalagang papel nito bilang patnugot ng La Solidaridad at sa kanyang walang-pamatid na pamana sa pamamahayag sa bansa.
Naganap ang paggunita sa kaarawan ni Del Pilar bago ang pambansang pagdiriwang ng Araw ng mga Bayani na ginugunita ngayong Lunes, Agosto 31.
About the Author
