Nasa mabuting kamay ang kinabukasan ng Alas Pilipinas habang ang mga batang manlalaro ay nagbibigay ng sigla, determinasyon, at tapang para sa kanilang “once-in-a-lifetime” na pagkakataon, ang paglalaro sa FIVB Volleyball Men’s World Championship na magsisimula sa Biyernes, Setyembre 12, sa SM Mall of Asia Arena.
Itinalaga ni Italian coach Angiolino Frigoni ang tiwala sa mga bagong henerasyon mula sa UAAP at NCAA, kabilang sina Michaelo “Buds” Buddin, Jade Disquitado, Louie Ramirez, Eco Adajar, Josh Ybañez, Leo Ordiales, at Peng Taguibolos.
Para kay Ramirez, dalawang beses na MVP ng NCAA at kasalukuyang naglalaro sa Cignal, malaking karangalan ang posibilidad na makabilang sa final roster at magsimula sa pambungad na laro kontra Tunisia alas-7 ng gabi, matapos ang engrandeng opening ceremony na tampok ang K-Pop group BOYNEXTDOOR at Cebuana singer-songwriter Karencitta.
“This will definitely be one of the best moments of my volleyball career. It’s the world championship,” ani Ramirez, na kayang umangkop bilang outside o opposite hitter.
Si Buddin, na nagmula sa Palawan at dati’y nangangarap lamang na makapasok sa Palarong Pambansa, ay umaasang makukumpleto ang kanyang kwento matapos magningning sa SEA V.League 2024 kung saan siya’y nagkamit ng dalawang Best Outside Hitter awards at tumulong sa back-to-back bronze medals ng Pilipinas.
“Honestly, this is a dream come true… lalo na kung maisasama ako sa lineup para sa World Championship. That would be the biggest moment of my career so far,” wika ni Buddin.
Samantala, si Disquitado, 21, na unang tinawag sa pambansang koponan sa 2023 SEA Games, ay nananatiling “spark plug” mula sa bench. Para sa kanya, ang paglalaro sa ganitong antas ay inspirasyon sa mas batang henerasyon.
“Honestly, I never expected to reach this level. I’m proud of myself for making it this far. I hope younger players keep working hard so they can also reach this level someday,” ani Disquitado, na naging bahagi ng five-peat team ng NU.
Para naman kay Adajar ng La Salle, na gagabay sa playmaking kasabay ni Owa Retamar, isang malaking hamon ang kanyang papel bilang setter sa world stage.
“As a rookie and one of the youngest, being a setter is one of the toughest roles. But with the guidance of my older teammates and the support of Filipino fans, I feel confident,” paliwanag ng 24-anyos na si Adajar.
Magkakaiba man ang kanilang pinagmulan sa liga, iisa ang pangako ng mga batang Alas: manatiling handa, mag-ambag kung tatawagin, at magpakita ng parehong energy kahit bilang taga-suporta sa bench.
Lalaban ang Pilipinas kontra Egypt sa Setyembre 16 at haharapin ang Asian powerhouse Iran sa Setyembre 18. Malalaman ang opisyal na final 14-man roster matapos ang preliminary inquiry sa Huwebes, Setyembre 11. (RON TOLENTINO)
About the Author
