DAVAO OCC.TIGERS COCOLIFE TINAMBAKAN  ANG KUYAS NG BULACAN SA MPBL ELIMS

NANLILISIK  ang bangis ng Davao Occidental Tigers Cocolife matapos lantakan ang mga Kuyas ng Bulacan, 91-55, sa eliminasyon ng Maharlika Pilipinas Basketball League kamakalawa sa Nueva Ecija Coliseum.

Maagang kumawala ang opensa ng Tigers sa pagputok nina Dave Arana at Bam Gamalinda kung saan ay pumoste na ng double digit spread, 19- 9 sa unang yugto pa lamang.

Nagpasiklab naman si Tiger Art de la Cruz na nagpadulas sa opensa ng Davao  Cocolife na naghigpit na rin ng depensa ni Tigers coach Manu Inigo upang bumuka pa ang koponang pagaari ng Bautista clan sa  Davao Occidental at suportado nina Cocolife President Atty. Jose Martin Loon, SVP Joseph Ronquillo, VP Rowena Asnan at EVP Atty. Elmore Omelas, para sa 40-24 halftime score.

Bahagyang nag-rally ang Bulacan sa 3rd quarter sa pagsisikap nina Kuyas Nino Ybanez Paulo Hubalde at Choso Montero pero pinatahimik sila ni Biboy Enguiyo habang sumiklab naman si Jun Manzo  sa final quarter tungo sa pagtala ng ikalimang panalo at nag-iisang talo (5-1).

“Hear our Tigers roar .Mas mabangis pa yan sa susunod na mga laban.Kailangang maging matapang dahil ang lalakas ng mga makakalaban”, wika ni  Tigers team manager Arvin Bonleon.

Si Gamalinda ang tinanghal na best player sa kanyang 15 points at 4 rebounds. (DANNY SIMON)