Top 2 most wanted person ng NPD nalambat sa Navotas

SA selda magpa-pasko ang isang lalaki na nakatala bilang top 2 most wanted person sa Northern Police District (NPD) matapos mabingwit ng pulisya sa isinagawang manhunt operation sa Navotas City, kamakalawa ng hapon.

Kinilala ni Navotas police chief P/Col. Mario Cortes ang naarestong akusado na si alyas Ananias, 34, ng Brgy., NBBS Kaunlaran at nakatala naman bilang Top 3 MWP sa Navotas City.

Sa kanyang report kay NPD Director P/BGen. Rizalito Gapas, sinabi ni Col. Cortes na nakatanggap ng impormasyon ang mga operatiba ng Warrant and Subpoena Section (WSS) na naispatan ang presensiya ng akusado sa kanilang lugar.

Bumuo ng team ang WSS sa pangunguna ni P/Maj. Danilo Esguerra Jr. saka nagsagawa ng manhunt operation na nagresulta sa pagkakaaresto sa akusado dakong alas-5:00 ng hapon sa Bidbid Street Barangay NBBS kaunlaran Navotas City.

Ani Maj. Esguerra, dinakip nila ang akusado sa bisa ng warrant of arrest na inisyu ni Presiding Judge Romana M.M.P. Lindayag Del Rosario ng Navotas City Regional Trial Court Branch 287 noong December 11, 2023, para sa kasong Murder under Article 248 of the Revised Penal Code (4 Counts).

Pansamantalang nakapiit sa Custodial Facility Unit ng Navotas CPS ang akusado habang hinihintay ang pagpapalabas ng commitment order mula sa korte.