MANILA — Pinagtibay nina Finance Secretary Ralph G. Recto at bagong talagang Securities and Exchange Commission (SEC) Chairperson Francis Lim ang kanilang pagtutulungan upang pabilisin ang mga repormang magpapadali sa pagnenegosyo at magpapalalim sa capital market ng bansa.
Sa pagpupulong noong Hunyo 23, 2025, inilatag nina Recto at Lim ang mga pangunahing inisyatibong alinsunod sa direktiba ni Pangulong Ferdinand R. Marcos, Jr. na palakasin ang kompetitibidad ng pamilihang pinansyal ng Pilipinas at gawing mas maayos ang daloy ng mga pamumuhunan.
Isa sa mga pangunahing tututukan ng SEC ay ang epektibong pagpapatupad ng Capital Markets Efficiency Promotion Act (CMEPA) — isang makasaysayang batas na layong palawakin ang partisipasyon ng mga mamumuhunan at bawasan ang sagabal sa mga transaksyon sa merkado.
Kasabay nito, palalakasin din ng SEC ang regulasyon sa crypto asset service providers (CASPs) upang mapangalagaan ang mga mamimili mula sa sistemikong panganib, tiyakin ang pagsunod sa mga batas, at paigtingin ang tiwala sa mga bagong anyo ng digital finance.
Bilang tugon sa Ease of Doing Business Act, ipatutupad ng SEC ang real-time application tracking system para sa mas malinaw at mabilis na transaksyon, habang isinusulong din ang pagsusuri at pagbawas sa mga bayarin sa mga dokumentong digital o pisikal. Magkakaroon din ng moratorium sa fee increases sa takdang panahon upang mapabuti ang karanasan ng mga kliyente.
Plano rin ng SEC na padaliin ang registration process para sa mga small and medium enterprises (SMEs) at buksan ang repurchase market sa mga non-bank financial institutions (NBFIs). Kasama rin dito ang pagpapalakas ng supervision sa mga lending at financing companies upang matiyak ang pagsunod sa truth-in-lending, patas na pamantayan sa pagpapautang, at pagbabawal sa mapang-abusong paniningil.
Sa layuning gawing mas episyente ang merkado, isusulong ng SEC ang paglilinaw ng equity at debt regimes upang mapabilis ang proseso ng aprubadong transaksyon; pag-update sa panuntunan ng credit rating agencies upang palakasin ang kredibilidad; pag-align sa short selling at securities lending sa global standards; at rebisyon sa IRR ng Real Estate Investment Trust (REIT) upang tumugon sa kasalukuyang pangangailangan ng merkado.
Sa pangmatagalang plano, itutulak ng SEC ang regulatory reforms upang mapaabot ang mga lokal na securities sa mga global index, at bubuo ng roadmap para sa alternatibong investment products gaya ng options, futures, at commodity futures market. Kasabay nito, paiigtingin din ang pagsusuri sa corporate governance at investor protection sa pamamagitan ng risk-based audits at digital monitoring tools.
Sa ilalim ng pangangasiwa ng Department of Finance, hangad ng SEC na magpatatag ng isang inklusibo, makatarungan, at matatag na sistemang pinansyal para sa bawat Pilipino.
About the Author
