Nilinaw ng komedyanteng si Pokwang sa kanyang Instagram account na ang lalaki sa viral video na nakasangkot sa pananakit sa isang nagtitinda gamit ang kariton ay kanyang kapatid.
Humingi rin siya ng paumanhin sa biktima, si Crispin Villamor, at sa anak nito na nasaksihan ang insidente.
“Opo, kapatid ko po ang lalaki sa video at hindi ko po kinatutuwa ang kanyang ginawa,” saad ni Pokwang sa kanyang post.
Dagdag pa niya, humihiling siya ng kapatawaran at ipinangako na bibisitahin ang anak ng biktima.
Ayon sa video, makikita ang kapatid ni Pokwang na pinagmumura at binatukan si Villamor sa harap ng kanyang menor de edad na anak na walang tigil sa pag-iyak dahil sa takot.
Agad namang nagtungo ang driver sa istasyon ng pulisya upang makipag-ayos kay Villamor, ayon sa ulat ng Antipolo City Police.
May paalala din si Pokwang sa isang pulitiko at iba pang indibidwal na nagpost ng larawan ng kanyang buong pamilya sa social media.
“Ingat po kayo kasi mambabatas pa naman kayo, so alam po ninyo dapat po ‘yung tinatawag nating cyberlibel, cyberbullying sir. Pinost po ninyo ‘yung mukha ng buong pamilya ko. Isa lang po ang may kasalanan. Asan po ‘yung privacy, ‘yung proteksyon ng pamilya ko?”
Pinasalamatan naman niya si Antipolo City Mayor Casimiro “Jun” Alcantara Ynares III sa agarang pag-aksyon sa para ayusin ang problema.
“Humihingi din po ako ng paumanhin sa aming mayor,” dagdag pa niya.
Ang Land Transportation Office (LTO) ay naglabas ng show-cause order laban sa driver at isinailalim ang kanyang driver’s license sa preventive suspension sa loob ng 90 araw.
Sa kanyang pahayag, mariing binigyang-diin ni Pokwang na hindi siya sumusuporta sa ginawa ng kanyang kapatid at nananawagan ng pag-iingat sa publiko sa pag-post sa social media.
Ang insidenteng ito ay naganap sa Barangay San Roque, Antipolo City, at naging viral sa social media, na nagbunsod ng masusing diskusyon tungkol sa disiplina sa kalsada at kaligtasan ng mga bata.
About the Author
