Kinumpirma ng Japan-based credit rating agency na Rating and Investment Information, Inc. (R&I) ang mataas na investment-grade na ‘A-’ rating ng Pilipinas na may stable outlook, patunay umano ng matatag na ekonomiya, lumalaking pamumuhunan, at maayos na pamamahala ng pananalapi ng bansa.
“Ito ay tagumpay na dapat ipagdiwang ng bawat Pilipino. Ibig sabihin nito, mataas pa rin ang tiwala ng mga credit rating agencies at investors sa atin. Kaya mas dadami ang papasok na investments, mas maraming trabaho ang malilikha, mas tataas ang kita, at mas maraming Pilipino ang maiaahon sa kahirapan,” pahayag ni Finance Secretary Ralph Recto.
Noong Agosto 2024, unang inakyat ng R&I ang Pilipinas sa A-level sa ilalim ng administrasyong Marcos Jr.—ang kauna-unahang pagkakataon na nakamit ng bansa ang ganitong antas.
Ayon sa R&I, nananatiling isa sa pinakamabilis ang paglago ng ekonomiya ng Pilipinas sa Southeast Asia.
Sa ikalawang quarter ng 2025, naitala ang 5.5% GDP growth ng bansa, mas mataas kaysa China (5.2%), Indonesia (5.1%), Malaysia (4.5%), Singapore (4.3%), at Thailand (2.8%).
Naging pangunahing dahilan nito ang malakas na demand sa lokal na merkado, kasabay ng patuloy na pagbaba ng inflation na bumagsak sa 0.9% noong Hulyo 2025.
Nakikita rin ng R&I ang tuloy-tuloy na paglago ng pribado at pampublikong pamumuhunan, lalo na sa IT-BPM at electronics manufacturing. Kabilang dito ang pagpapalawak ng semiconductor sector na nakabase sa Pilipinas.
Suportado ito ng mga reporma ng gobyerno gaya ng Public-Private Partnership (PPP) Code at CREATE MORE Act na layong hikayatin ang mas maraming pribadong sektor na makilahok sa pagpapaunlad ng ekonomiya.
Binigyang-diin ng R&I ang maingat na hakbang ng pamahalaan para pababain ang fiscal deficit at mapanatili ang utang sa ligtas na antas.
Mula sa 8.6% deficit noong 2021, bumaba ito sa 5.5% ngayong 2025 at target pang bumaba sa 4.3% pagsapit ng 2028 at 3% sa 2030.
Dagdag pa rito, binigyang diin ng R&I na nananatiling manageable ang interest payment burden ng bansa dahil sa mas epektibong pangongolekta ng buwis at mas mahusay na paggasta.
Ayon kay Recto, nakatuon ang gobyerno sa Medium-Term Fiscal Program na inaasahang magpapalago ng ekonomiya ng Pilipinas sa PHP 42.6 trilyon pagsapit ng 2030, habang mapapanatili ang utang sa 58% ng GDP o PHP 24.7 trilyon.
Sa mataas na credit rating na ito, mas mura ang utang ng gobyerno at pribadong sektor, mas maraming dayuhang puhunan ang inaasahang papasok, at mas maraming oportunidad sa trabaho at serbisyong panlipunan ang mapapakinabangan ng sambayanang Pilipino.
About the Author
