Bunsod ng sunod-sunod na malalalang krimen na kinasangkutan ng mga kabataan, pormal nang isinusulong sa Senado ang isang komprehensibong pagsusuri at posibleng pag-overhaul sa Republic Act 9344 o ang Juvenile Justice and Welfare Act of 2006.
Ipinahayag ni Senator Erwin Tulfo, Chairman ng Senate Committee on Social Justice, Welfare, and Rural Development, na layon ng kaniyang komite na busisiin ang mga “glaring gaps” o malalaking puwang sa kasalukuyang batas.
Ayon sa kaniya, ang mga kahinaang ito ay nagagamit umanong panangga ng mga batang lumalabag sa batas at nagkakait ng hustisya sa mga biktima.
Muling naging maugong ang panawagan na amyendahan ang batas matapos ang madugong school shooting noong Hunyo 22 sa San Jose National High School sa Tacloban City.
Tatlong mag-aaral ang nasawi habang 20 iba pa ang sugatan matapos pagbabarilin ng dalawang suspek na may edad 14 at 15 lamang.
Sa ulat ng pulisya, lalo pang nag-init ang publiko nang madiskubreng alam ng mga suspek ang tungkol sa RA 9344 at binalak ang krimen sa pag-aakalang hindi sila makukulong dahil sa kanilang edad.
Maliban dito, may mga naiulat ding insidente ng pananaksak ng mga menor de edad sa Cavite at Negros Occidental nitong mga nakaraang linggo.
BASAHIN: Marcos: Protektahan ang kabataan laban sa karahasan at kapabayaan
“Hindi lang natin tinitingnan ang nakasulat sa batas—inaayos natin ang sirang katotohanan sa ibaba. Maraming biktima ng krimen na pinangunahan ng menor de edad ang tila walang laban dahil sa pagpapatupad ng Juvenile Law,” pahayag ni Tulfo.
Nahahati ang opinyon ng iba’t ibang sektor sa kung paano dapat tugunan ang tumataas na kriminalidad sa mga kabataan.
Nais ng mga mambabatas at ilang sektor na ibaba ang minimum age of criminal responsibility (kasalukuyang nasa 15 taong gulang) upang maparusahan ang mga menor de edad na gumagawa ng mga karumal-dumal na krimen tulad ng pagpatay.
Giit din nila na dapat papanagutin nang mas mabigat ang mga magulang ng mga batang nasasangkot sa krimen.
Sa kabilang banda, mariing tinututulan ng Commission on Human Rights (CHR), mga psychologist, at mga social worker ang pagbaba ng edad ng kriminal na pananagutan.
Ayon sa kanila, ang problema ay wala sa mismong batas kundi sa kabiguan ng pamahalaan at mga Local Government Unit (LGU) na pondohan at itayo ang mga pasilidad tulad ng Bahay Pag-asa.
Ang mga sentrong ito ang dapat na nagpapatupad ng rehabilitasyon at interbensyon sa mga Children in Conflict with the Law (CICL).
Sentro rin sa gagawing imbestigasyon ng Senado ang matinding kakulangan ng mga gumagana at maayos na Bahay Pag-asa sa bansa.
Bilang dating Kalihim ng DSWD, inamin ni Tulfo na nakita niya mismo ang “systemic failure” kung saan walang sapat na pasilidad para i-rehab ang mga batang naliligaw ng landas.
Tiniyak naman ng komite na pakikinggan nila ang lahat ng panig—kabilang ang mga eksperto sa batas, kapulisan, simbahan, mga grupong panlipunan, at mga magulang—upang balansehin ang paggawad ng hustisya sa mga biktima at ang paggabay sa kinabukasan ng mga kabataang Pilipino.
About the Author
