NASAWI ang dalawang construction worker matapos gumuho ang isang 18-metro ang lalim na hukay para sa water pipeline project ng Maynilad sa Pamplona, Las Piñas City, nitong Linggo ng hapon, Hunyo 28.
Ayon kay Lieutenant Colonel Teoson Rosarito, assistant police chief ng Las Piñas, sa panayam ng dzBB Super Radyo nitong Lunes ng umaga, biglang gumuho ang trench o kanal sa kahabaan ng Aquarius Street dahilan upang matabunan ng lupa ang mga manggagawa.
Naialis ng mga recovery team ang huling naiipit na manggagawa bandang alas-4:30 ng hapon nitong Linggo, ngunit dalawa sa kanila ang idineklarang patay.
Sa kabuuang limang manggagawang naapektuhan ng insidente, tatlo ang pinalad na makaligtas. Nakaligtas ang dalawa matapos maiwasang mabaon nang tuluyan sa gumuho na pader, habang mabilis namang isinugod sa ospital ang ikatlong manggagawa na nagtamo ng mga pinsala.
“Dalawa po ang patay dito sa insidenteng ito… Tatlo po ang nakaligtas,” pahayag ni Rosarito sa radyo.
Pinagbawalan muna ng mga awtoridad ang mga tauhan ng Maynilad na pumasok sa excavation site matapos itong harangan at i-seal ng polisya habang isinasagawa pa ang imbestigasyon.
Sa isang pahayag nitong Lunes, kumpirmado ng Maynilad ang naganap na aksidente at pansamantala nilang isuspinde ang operasyon sa naturang site. Sinabi ng kumpanya na nakipagtulungan sila sa Bureau of Fire Protection (BFP), pamunuan ng barangay, at mga lokal na disaster response authorities para sa emergency response.
“Kasama ng mga manggagawa at ng kanilang mga pamilya ang aming panalangin sa mahirap na panahong ito,” anang Maynilad.
Idinagdag din ng utility company na nakikipag-ugnayan na sila sa kanilang hindi pinangalanang kontraktor upang magpaabot ng tulong sa mga apektadong manggagawa at sa kanilang mga kamag-anak, at nangakong “ganap na makikipagtulungan” sa ginagawang imbestigasyon.
Samantala, pinabulaanan naman ni Rosarito ang mga kumakalat na ulat na may dalawang Chinese national sa mga biktima.
“Wala po. Wala pong ganoon… Pilipino na po ito,” paglilinaw niya, sabay sabing nasa talaan na ng lokal na pulisya ang mga tirahan ng mga biktima.
Kumpirmado rin mula sa opisyal ng pulisya na ang naturang paghuhukay ay bahagi ng pagkukumpuni sa isang main pipeline sa lugar.
Dahil sa insidente, pansamantalang pinutol ng Maynilad ang suplay ng tubig sa ilang bahagi ng apektadong lugar habang nananatiling sarado ang site, at wala pa silang ibinibigay na petsa kung kailan muling ibabalik ang trabaho rito.
About the Author
