LTFRB, maglulunsad ng nationwide crackdown vs ilegal terminal at 'colorum' -

Matapos ipahayag ang planong pagbabawal sa mga luma at hindi ligtas na public utility vehicles (PUVs), mas pinalawak pa ng Land Transportation Franchising and Regulatory Board (LTFRB) ang kanilang kampanya sa pamamagitan ng pagtugis sa mga ilegal na terminal sa buong bansa, partikular na sa mga urban area.

Ayon kay LTFRB Chairman Vigor Mendoza II nitong Linggo, layunin ng “aggressive reform program” na ito na wakasan ang matagal nang pagbalewala sa kapakanan at kaligtasan ng mga komyuter.

Binigyang-diin ni Mendoza na ang mga ilegal na terminal ay nagsisilbing kuta ng mga “colorum” na sasakyan at pangunahing pinagmumulan ng korapsyon.

Napansin ng ahensya na karamihan sa mga ilegal na terminal ay matatagpuan sa mga mapanganib na lugar at kulang sa pasilidad gaya ng maayos na banyo at masisilungan.

Mariing sinabi ni Mendoza na ang ganitong kondisyon ay labag sa polisiya ng LTFRB, lalo na para sa mga buntis, bata, PWD, at senior citizens.

Nagbabala rin ang LTFRB na ang mga colorum na sasakyan ay walang rehistro at insurance. Nangangahulugan ito na ang mga pasahero at kanilang pamilya ang sasagot sa lahat ng gastos sa pagpapagamot o libing sakaling magkaroon ng malubhang aksidente.

Upang masigurong magiging epektibo ang crackdown, magpapakalat ang LTFRB ng mga “mystery passengers” upang matukoy ang mga tagong terminal, kabilang ang mga nasa loob ng mga mall at iba pang establisyimento. Inatasan na rin ang lahat ng regional directors na magsagawa ng random at surprise inspections sa kanilang mga nasasakupan.

“Hindi na natin dapat hintayin ang holiday para mag-inspeksyon,” ani Mendoza. “Linawin ko lang, ang mga hindi susunod ay dapat maghanda sa kaukulang parusa.”

Naglabas din ng babala ang LTFRB sa mga PUV operator na tanging sa mga accredited na terminal lamang pumarada.

Ayon sa ahensya, ang pagtangkilik sa mga hindi rehistradong terminal ay maaaring magresulta sa suspensyon o tuluyang pagbawi ng kanilang prangkisa.

Kasabay nito, mahaharap din sa kaukulang demanda ang mga opisyal o indibidwal na mapapatunayang nagpapatakbo at nagbabantay sa mga ilegal na operasyong ito.