Opisyal nang kinilala ang Pilipinas bilang bansang may pinakamalalang sitwasyon ng trapiko sa buong Asya, ayon sa inilabas na 2025 TomTom Traffic Index.
Batay sa pagsusuri ng GPS data mula sa 482 lungsod sa buong mundo, lumalabas na patuloy ang pagbigat ng daloy ng mga sasakyan sa mga pangunahing sentro ng komersyo sa bansa.
Sa gitna ng lumalalang krisis sa transportasyon, muling nanguna ang Davao City bilang pinaka-congested na lungsod sa Pilipinas.
Nakapagtala ito ng 66.2% average congestion level, dahilan upang pumangatlo ito sa ika-4 na pwesto sa buong Asya at ika-12 sa buong mundo.
Hindi rin nagpahuli ang Metro Manila na pumasok sa ika-12 pwesto sa Asya at ika-40 sa pandaigdigang listahan.
Ayon sa ulat, ang ganitong antas ng trapiko ay katumbas ng halos anim na araw na nawawala sa buhay ng bawat Pilipinong komyuter taon-taon dahil lamang sa pagkabalam sa kalsada.
Bukod sa aspetong pinansyal, seryoso rin ang banta nito sa kalusugan ng publiko dahil sa polusyon sa hangin na dulot ng emisyon ng mga sasakyan.
Ayon sa datos ng DENR, 80 porsyento ng polusyon sa Metro Manila ay nanggagaling sa mga tambutso ng sasakyan, habang iniulat naman ng United Nations Environment Programme na nasa 40,000 kamatayan sa bansa noong 2021 ang maiuugnay sa fine particle pollution.
Ang congestion level na ginamit sa index ay ang sukat ng karagdagang oras na ginugugol sa biyahe kumpara sa maayos at maluwag na daloy ng trapiko.
Pinaliwanag ng TomTom na ang congestion level ay sinusukat sa pamamagitan ng karagdagang oras (sa porsyento) na ginugugol ng isang motorista kumpara sa sitwasyong maluwag ang daloy ng trapiko (free-flow conditions).
Nilinaw sa ulat na ang mataas na congestion level ay hindi laging nangangahulugan na ang lungsod ang may pinakamabagal na bilis ng takbo, kundi ito ay nakabase sa dinamikong salik na nakakaapekto sa kabuuang daloy ng mga sasakyan.
Sa harap ng nakakaalarmang ulat na ito, muling nabubuhay ang panawagan para sa mas maayos na mass transport system at epektibong urban planning upang maibsan ang pasakit sa mga manggagawang Pilipino.
About the Author
