Iginiit ni Executive Secretary Ralph Recto na dapat ding mapakinabangan ng mga middle-class na Pilipino ang Zero Balance Billing (ZBB) policy sa mga piling ospital ng pamahalaan.
Ayon kay Recto, ang mga manggagawang ito na “isang pagkaka-ospital lang ay baon na sa utang” ay nararapat lamang makaramdam ng ginhawa mula sa mga programa ng administrasyong Marcos.
Sa isang pahayag nitong Linggo, ibinahagi ni Recto na nakipagpulong siya kina Health Secretary Teodoro Herbosa at PhilHealth President Edwin Mercado noong Enero 20 sa Malacañang.
Layunin ng pagpupulong na matiyak ang maayos na implementasyon ng ZBB program ngayong taon gamit ang karagdagang pondo mula sa national budget.
Hinikayat ni Recto ang PhilHealth na palawakin ang kanilang benefit packages, lalo na para sa middle class na regular na nagbabayad ng buwis at kontribusyon. Binigyang-diin niya na kailangang makita ng mga contributors ang kaukulang balik ng kanilang ibinabayad sa pamamagitan ng mas magandang serbisyong medikal.
Sa ilalim ng programang ZBB, na isa sa mga pinalakpakan sa State of the Nation Address (SONA) ni Pangulong Ferdinand Marcos Jr., ang mga pasyenteng naka-admit sa basic ward ng alinman sa 87 ospital na pinapatakbo ng DOH ay wala nang babayaran mula sa sariling bulsa, anuman ang kanilang antas sa buhay. Ang lahat ng bayarin sa ospital at doktor ay sasagutin ng PhilHealth at ng budget ng DOH.
Nilinaw naman sa ulat na ang ZBB ay limitado lamang sa mga pasyenteng nasa ward accommodation. Sakaling piliin ng pasyente na lumipat sa isang private room, ang regular na PhilHealth benefits na may co-payment na lamang ang iiral, kung saan magbabayad na ang pasyente ng bahagi ng kanyang bill.
Bagaman maaari ring magpatupad ng katulad na programa ang mga pribadong ospital, limitado lamang sa 10 porsyento ng kanilang bed capacity ang inilalaan para sa ward accommodation. Ang ZBB ng DOH ay iba rin sa “No Balance Billing” (NBB) ng PhilHealth na nagsimula noong 2011, dahil ang NBB ay para lamang sa mga indigent, senior citizens, kasambahay, at lifetime members.
Sa pamamagitan ng direktibang ito, inaasahang mas magiging “inclusive” ang sistemang pangkalusugan ng bansa para sa lahat ng sektor ng lipunan, hindi lamang para sa mga pinakamahihirap kundi pati na rin sa mga manggagawang nagsisilbing haligi ng ekonomiya.
About the Author
