Matapang na binalikan ni Liza Soberano ang kanyang masakit at magulong kabataan sa isang tell-all interview sa Can I Come In?, ang hybrid podcast-documentary ni Sarah Bahbah — at walang tinipid na detalye ang aktres sa pagbubunyag ng mga trauma na kanyang pinagdaanan.
Ayon kay Liza, lumaki siya sa piling ng isang ina na lulong sa crystal meth at isang ama na sangkot sa mga kasong kriminal, kabilang ang paggawa ng droga at illegal possession of firearms. Deportado ang ama, at nakulong naman ang ina, dahilan para siya at ang kapatid ay mauwi sa foster care.
Pero imbes na makahanap ng ligtas na tahanan, napunta si Liza sa kamay ni “Melissa” — isang foster parent na tinawag siyang “family dog,” pinaupo sa kahong karton, pinalinis ng dumi ng aso gamit ang dila, pinabayaan nang ilang araw na walang pagkain, at pinatulog sa malamig at madilim na garahe. Minsan pa’y tinakot siyang ilalagay ang kanyang kapatid sa freezer kung hindi siya tatahimik.
Kuwento pa ng aktres, tinuruan siyang manahimik at magkunwaring maayos ang lahat tuwing dumarating ang mga social worker. “Bilang bata, pinaniwala ko sarili ko na mahal niya ako, kahit kabaligtaran ang ginagawa niya,” ani Liza.
Sa edad na 10, lumipat si Liza sa Pilipinas at muling nakasama ang kanyang ama, ngunit nanatiling “malamig at estranghero” ang relasyon. “Marami siyang hinihingi sa akin bilang anak, pero hindi niya naman ako pinalaking kasama siya,” wika ng aktres.
Ngayon, aminado si Liza na patuloy pa rin niyang hinahanap ang “kalayaan” mula sa takot at sa iniisip ng ibang tao. “Hope, I promise you, I’m never going to let anyone make you feel inferior ever… Love yourself first, and life will get so much better,” sabi niya sa sarili.
Kasabay ng emosyonal na pagbubunyag na ito, kinumpirma rin ni Liza na tatlong taon na silang hiwalay ni Enrique Gil.
About the Author
