Hayagang idineklara ni National Bureau of Investigation (NBI) Regional Director Jeremy Lotoc sa harap ng Impeachment Court ngayong Lunes, Hulyo 13, 2026, na nakitaan ng krimeng grave threats at inciting sedition si Vice President Sara Duterte.
Sa ikaapat na araw ng impeachment trial, ipinatawag ng prosecution panel si Lotoc, na dating pinuno ng NBI Cybercrime Division, bilang kanilang ikalawang saksi para sa Impeachment Article IV.
Ang naturang artikulo ay nakasentro sa mga alegasyon na nagbanta ang bise presidente na papatayin si Pangulong Ferdinand Marcos Jr. at ang mga miyembro ng pamilya nito.
Sa pagtatanong ni prosecution counsel Virgil Ligutan kung kinonsidera ba ng ahensya ang depensa ni Duterte na ang kanyang mga pahayag ay bahagi lamang ng malayang pagpapahayag o freedom of speech, mariin itong tinanggihan ni Lotoc base sa tatlong dahilan.
Ayon kay Lotoc, hindi maaaring ituring na malayang pagpapahayag kapag ang ikalawang pinakamataas na opisyal ng bansa ay hayagang nag-anunsyo na kumuha siya ng gunman para patayin ang mismong Pangulo.
Babala pa niya, kung papayagan ang ganitong mga pahayag sa ngalan ng freedom of speech ay magdudulot ito ng kaguluhan dahil kahit sino ay maaari nang magbanta.
Binigyang-diin ng saksi na pinoprotektahan lamang ng batas ang legal na pagpapahayag at hindi ang mga salitang bumubuo na sa isang kriminal na krimen.
Bagamat tinutulan ng defense attorney na si Mark Vinluan ang direktang pagtatanong ng prosecution kung nagkasala ba ang bise presidente, mismong si Presiding Officer Chiz Escudero ang nag-usisa kay Lotoc kung may sapat na batayan ang NBI para maghain ng reklamo base sa prima facie evidence.
Tugon ni Lotoc, naniniwala silang may naganap na krimen batay sa mga paunang ebidensya at may makatwirang katiyakan na mapatutunayan ito sa korte.
Gayunpaman, sa pagtatanong ni Senator-judge Erwin Tulfo, inamin ni Lotoc na nakatutok lamang ang kanilang dibisyon sa pagsusuri ng grave threats at sedition, at wala silang nabeberipikang impormasyon na nagpapatunay na gumawa nga ng hakbang si Duterte para isakatuparan ang pagkuha ng assassin.
Nilinaw naman ni Lotoc kay Senator-judge Risa Hontiveros na hindi kinakailangang may aktwal na gunman para maituring na grave threat ang naging pahayag ng bise presidente.
Sa kabilang banda, naging mainit ang paggisa nina Senator-judges Imee Marcos at Alan Peter Cayetano kay Lotoc dahil sa mga serye ng pagkakamali o typo sa mga dokumento ng NBI.
Kinuwestiyon ni Marcos ang subpoena para sa media na may petsang Nobyembre 6, 2024, gayong Nobyembre 23, 2024 pa lang naganap ang Zoom meeting kung saan nagbanta ang bise presidente.
Pinuna naman ni Cayetano ang pagkakamali sa dokumento kung saan nakasaad na nagretiro si Duterte bilang Kalihim ng Department of Justice sa halip na Department of Education.
Hiningan din ng linaw ng depensa ang magulong timeline ng mga dokumento, tulad ng isang affidavit na may petsang Pebrero 3, 2025, na nauna pa ng dalawang araw bago matanggap ng NBI ang sertipikasyon mula sa DOJ noong Pebrero 5, 2025.
Ipinagtanggol naman ng prosecutor na si Ligutan ang mga dokumento at sinabing naitama na ang mga kakulangang ito sa kanilang huling affidavit noong Pebrero 10, 2025 na kasalukuyang nakabinbin sa DOJ.
Kinatigan ni Senator-judge Tulfo na nagmura at nagbanta nga ang bise presidente sa video, ngunit nanghinayang ito sa palpak na paghawak ng NBI sa mga ebidensya.
Binalaan niya ang prosekusyon na tiyaking walang kahinaan ang kanilang kaso sa susunod dahil madalas itong ma-dismiss sa mga teknikalidad, na nag-aaksaya lamang sa pinaghirapan ng mga imbestigador.
About the Author
