Mariing itinanggi ng Malacañang nitong Lunes, Enero 12, ang mga kumakalat na ulat tungkol sa nalalapit na balasahan sa Gabinete ni Pangulong Ferdinand Marcos Jr.
Ayon kay Executive Secretary Ralph Recto, ang mga balita tungkol sa umano’y “Cabinet overhaul” ay walang basehan at hindi nakatutulong sa bansa.
“Sa kasalukuyan, walang nakatakdang Cabinet shake-up. Ang mga espekulasyon tungkol sa napipintong revamp ay walang anumang magandang layunin para sa gobyerno o sa mamamayang Pilipino,” pahayag ni Recto.
Binigyang-diin ni Recto na ang lahat ng miyembro ng Gabinete ay nagsisilbi sa ilalim ng kapangyarihan at pagpapasya ng Pangulo.
Dagdag pa niya, patuloy ang pagsusuri ng Office of the President sa performance ng bawat opisyal upang matiyak ang kalidad ng serbisyo.
Hinimok niya rin ang mga opisyal na huwag magpaapekto sa tsismis at manatiling nakatutok sa kanilang mga mandato.
Aniya, ang pananatili sa pwesto ay nakadepende sa tiwala at kumpyansa ng Punong Ehekutibo.
Sinuportahan din ito ng mga pahayag ni Communications Undersecretary Claire Castro noong nakaraang linggo.
Ayon kay Castro, wala silang natatanggap na anumang impormasyon o direktiba mula sa itaas tungkol sa panibagong round ng balasahan.
“Depende iyan sa kung ano ang nakikita ng Pangulo. Pero sa ngayon, wala kaming natatanggap na anumang komunikasyon na magkakaroon ng Cabinet revamp,” ani Castro sa mga reporter.
Matatandaang nagkaroon ng mahahalagang pagbabago sa Gabinete kamakailan nang maupo si Recto bilang Executive Secretary kapalit ni dating Chief Justice Lucas Bersamin.
Kasunod nito, itinalaga rin si Frederick Go bilang kalihim ng Department of Finance (DOF).
Noong Mayo 2025, matapos ang midterm elections, matatandaang nag-utos ang Pangulo ng “courtesy resignation” para sa lahat ng Cabinet secretaries upang bigyang-daan ang muling pag-aayos o recalibration ng kanyang liderato.
About the Author
