Upang lalong mapatibay ang pundasyon ng mga startup sa bansa, inilunsad ng Department of Science and Technology (DOST) ang programang “Strengthening the Regional Startup Ecosystem: Establishment of Provincial and Regional Innovation Hubs (iHubs)” noong Pebrero 24, 2026 sa Butuan City.
Dinaluhan ang pagtitipon nina DOST SOCCSKSARGEN Regional Director Engr. Sammy P. Malawan at Provincial Director Dr. Michael T. Mayo ng PSTO Cotabato, kasama ang iba pang mga regional directors at innovation champions mula sa buong Mindanao. Layunin ng aktibidad na pag-isahin ang mga estratehiya para sa pagbuo ng mas inklusibong komunidad ng mga startup sa rehiyon.
Isang seremonyal na paglagda sa Memorandum of Agreement (MOA) ang naging highlight ng programa, na nagpapakita ng pormal na komitment ng mga opisina ng DOST at kanilang mga katuwang sa pagtatatag ng mga iHubs. Nagsagawa rin ng mga workshop tungkol sa AI Harmonization at Smart Office System para sa mas mahusay na serbisyo sa gobyerno.
Ang mga iHubs na ito ay magsisilbing “shared spaces” para sa pagbuo ng mga ideya (ideation) at incubation; mentoring at paggawa ng prototypes; at access sa pondo at teknikal na suporta.
Sa kasalukuyan, mayroon nang itinatag na Innovation Hub sa University of Southern Mindanao sa Lalawigan ng Cotabato na nagsisilbing sentro ng kolaborasyon para sa mga estudyante, researcher, at mga lokal na innovator.
Target ng DOST SOCCSKSARGEN na magtayo pa ng mga karagdagang hubs sa buong rehiyon sa pakikipagtulungan sa mga unibersidad, lokal na pamahalaan, at pribadong sektor upang matiyak ang paglago ng mga technology-based startups sa SOCCSKSARGEN.
About the Author
