Patuloy na nagpapakita ng matatag na performance ang Pension Booster Program ng Social Security System (SSS) ngayong taon.
Ayon sa ahensya, pumalo sa average na 6.2 porsyento ang return on investment (ROI) ng programa mula Enero hanggang Mayo ng taong 2026.
Ang Pension Booster, na kilala rin bilang Voluntary Provident Fund, ay nananatiling maaasahang alternatibo para sa mga manggagawang Pilipino na nais mag-ipon para sa kanilang pagtanda.
Bagamat mas mababa ito nang bahagya kumpara sa performance noong nakaraang taon dulot ng pabago-bagong interes mula sa Bangko Sentral ng Pilipinas (BSP), nananatili pa rin itong mas mataas at kompetatibo kumpara sa karaniwang benchmark rates sa merkado.
Ayon kay Finance Secretary at Social Security Commission ex-officio Chair Frederick D. Go, patunay ang tagumpay na ito sa dedikasyon ng pamahalaan na patatagin ang retirement security sa bansa.
“Ang patuloy na magandang performance ng SSS Pension Booster ay nagpapakita ng ating komitment na protektahan ang pinansyal na kinabukasan ng mga manggagawang Pilipino. Sa pamamagitan ng maingat na pamamahala sa pondo, tinutulungan natin silang magkaroon ng mas ligtas at marangal na pagreretiro,” pahayag ni Go.
Mas mataas pa rin ang naitalang 6.2 porsyentong ROI ngayong taon kung ikukumpara sa year-to-date average ng 91-day treasury bill rate na nasa 4.77 porsyento lamang. Noong 2025, nagtala naman ang programa ng 6.83 porsyentong return.
Dahil sa lumalaking tiwala ng publiko, umakyat ng 21.8 porsyento ang kabuuang kontribusyon sa pondo na umabot sa P699 milyon noong 2025 mula sa P574 milyon noong 2024.
Upang mas mapalaki pa ang kikitain ng mga miyembro, pansamantalang inalis ng SSS ang one percent management fee sa kabuuang balanse ng Pension Booster accounts mula taong 2025 hanggang 2028. Dahil dito, buong-buong mapapakinabangan ng mga miyembro ang kita ng kanilang pamumuhunan.
Binigyang-diin naman ni SSS President and Chief Executive Officer Robert Joseph M. de Claro na bunga ito ng disiplinado at propesyonal na pamamahala sa pondo. Inanunsyo rin niya na maaari nang makita ng mga miyembro ang buwanang paglago (compounding growth) ng kanilang ipon sa pamamagitan ng kanilang My.SSS account online.
“Ang pagpaplano at pag-iipon para sa retirement ay dapat sinisimulan nang maaga. Mas matagal na nakalagak ang pera ng miyembro, mas malaki ang potensyal na kikitain nito,” dagdag ni De Claro.
Bukas ang Pension Booster Program sa lahat ng miyembro ng SSS. Maaaring magsimula ang kontribusyon sa halagang P500, at walang limitasyon kung magkano ang maximum na gustong ihulog.
Ang mga pondong ito ay pinagsasama-sama upang i-invest sa mga government securities, corporate bonds, fixed-income instruments, equities, at money market instruments kung saan ang kita ay tax-free o walang bawas sa buwis.
Para sa mga interesadong miyembro, maaari silang mag-enroll sa Pension Booster Program gamit ang kanilang opisyal na My.SSS account.
About the Author
