Tahasang binalikan ni Senate President Pro Tempore Panfilo Lacson si Senator Imee Marcos matapos nitong ibunyag na mayroong mahigit P2.5 bilyon na halaga ng “allocables” o pork barrel ang senadora sa ilalim ng 2025 National Expenditure Program (NEP).
Sa isang panayam sa radyo nitong Linggo, Enero 11, binigyang-diin ni Lacson na wala umanong moral na batayan si Marcos para batikusin ang 2026 national budget kung siya mismo ay nakinabang sa katulad na sistema noong nakaraang taon.
Ibinunyag ni Lacson na base sa mga dokumentong nakuha niya mula sa kampo ng yumaong DPWH Undersecretary Catalina Cabral, lumalabas na mayroong nakalaang P2.5 bilyon para kay Marcos.
Ayon kay Lacson, ang mga pondo ay inilipat mula sa NEP patungo sa 2025 General Appropriations Act (GAA) sa pamamagitan ng “insertions” sa panahon ng bicameral conference deliberations. Dagdag pa ng senador, bagamat may ilang pondo na na-flag, may bahagi na ng pondo ni Marcos para sa mga local road projects ang nailabas na.
Kinuwestiyon ni Lacson ang naging pagbatikos ni Marcos sa inaprubahang 2026 budget bill na tinawag ng senadora na “giniling” o pira-pirasong pork barrel dahil sa paglaki ng pondo para sa MAIFIP at AICS.
“Maingay siyang bumabatikos sa 2026 budget dahil sa ‘pork,’ pero may pork din siya sa 2025 GAA. Wala siyang moral ascendancy na magreklamo,” ani Lacson.
Dagdag pa ni Lacson, bakit nanahimik si Marcos noong kasama siya sa Senate contingent sa bicameral committee kung totoo ngang tutol siya sa pork barrel. Pinuna rin niya ang madalas na pagdalo ni Marcos sa mga distribusyon ng ayuda na ngayon ay tinatawag nitong “soft pork.”
“Ang mga taong nakatira sa bahay na gawa sa salamin ay hindi dapat mambato ng bato,” patutsada ni Lacson.
Hindi rin pinalampas ni Lacson ang mga kritisismo ni Marcos laban sa Senate Blue Ribbon Committee na kasalukuyang nag-iimbestiga sa flood control fund scandal. Itinanggi ni Lacson ang mga paratang na hinaharangan niya ang pagdawit sa ilang personalidad sa imbestigasyon.
“Anong pressure ang sinasabi niya gayong hindi naman siya dumalo sa kahit isang hearing na pinamunuan ko?” tanong ni Lacson. Naniniwala ang senador na may mga mambabatas, kabilang si Marcos at Sen. Rodante Marcoleta, na pilit na nanggugulo sa takbo ng imbestigasyon.
Tumanggi naman si Lacson na magkomento kung ang mga pork allocations ba ay gagamitin para impluwensyahan ang mga miyembro ng Kamara sa posibleng impeachment laban kay Vice President Sara Duterte. Paliwanag niya, ang Senado ang magsisilbing hurado kung sakaling matuloy ang kaso, kaya nararapat lamang na manatiling neutral ang mga senador.
About the Author
