Nagdulot ng kalituhan ang usapin tungkol sa isang lolong Aeta na hindi umano nakakuha ng kanyang P100,000 cash gift dahil sa pagiging “over age” o lagpas na sa 100 taong gulang.
Gayunpaman, sa ilalim ng Centenarian Act of 2016 (RA 10868) at ang mas pinalawak na Expanded Centenarians Act, malinaw ang mandato ng batas na basta’t ang isang Pilipino ay umabot sa edad na 100, siya ay nararapat na makatanggap ng nasabing biyaya.
Sa ilalim ng batas, ang P100,000 ay isang one-time cash gift mula sa gobyerno na may kasama pang Letter of Felicitation mula sa Pangulo.
Wala sa probisyon ng batas na mawawala ang karapatan ng isang senior citizen sa nasabing halaga kung siya ay lagpas na sa 100 taon, hangga’t hindi pa niya ito natatanggap noong siya ay tumuntong sa nasabing edad.
Bukod sa malaking halaga para sa mga centenarian, pinalawig din ang benepisyo para sa mga “milestone ages.” Makakatanggap na rin ng P10,000 cash gift ang mga senior citizen na sasapit sa edad na 80, 85, 90, at 95.
Ang National Commission of Senior Citizens (NCSC) at ang DSWD ang mga ahensyang inatasan upang siguraduhing maabot ang lahat ng mga kwalipikadong lolo at lola, kabilang ang mga nasa Indigenous Peoples (IP) communities at maging ang mga nasa ibang bansa.
Upang maiwasan ang problema sa pag-claim, paalala ng NCSC na kailangan lamang ng sapat na patunay ng edad gaya ng birth certificate o anumang valid identification.
Para sa mga kapatid nating katutubo na posibleng walang birth certificate, may mga proseso ng endorsement mula sa Local Government Units (LGUs) at NCIP upang mapatunayan ang kanilang kwalipikasyon at hindi mapagkaitan ng benepisyong para sa kanila.
About the Author
