Muling pinagtibay ng Manila Electric Company (Meralco) at ng Philippine National Police (PNP) ang kanilang estratehikong kooperasyon upang paigtingin ang kampanya laban sa pagnanakaw ng kuryente at pagsira sa mga pasilidad nito sa loob ng franchise area ng kumpanya.
Pormal na nilagdaan ang isang Memorandum of Understanding (MOU) kamakailan sa PNP Headquarters sa Camp BGen Rafael T. Crame, Quezon City.
Dumalo sa seremonya sina Meralco Executive Vice President at COO Ronnie L. Aperocho, First Vice President Jerry B. Lao, PNP Chief PGEN Jose Melencio C. Nartatez, at PNP Acting Director for Investigation and Detective Management PBGEN Matthew P. Baccay.
Sa ilalim ng panibagong kasunduan, magtutulungan ang Meralco at PNP sa pamamagitan ng mas pinaigting na law enforcement, koordinadong imbestigasyon, at mas mahigpit na pagpapatupad ng Republic Act No. 7832 o ang Anti-Electricity and Electric Transmission Lines/Materials Pilferage Act.
Bukod sa paghuli sa mga lumalabag sa batas, layunin din ng pakikipagtulungang ito na palawakin ang kamalayan ng publiko ukol sa matinding panganib sa kaligtasan at mga legal na parusa sa paggamit ng mga nakaw o tampered na kuntador, kable, at kawad ng kuryente.
Binigyang-diin ng pamunuan ng Meralco ang kahalagahan ng suporta ng kapulisan upang mapanatili ang kaligtasan ng mga komunidad at ang katatagan ng suplay ng kuryente sa bansa.
Batay sa huling tala ng kumpanya noong nakaraang taon (2025), umabot sa mahigit 5,000 ilegal na koneksyon ang matagumpay na nahuli ng mga awtoridad habang mahigit 13,000 tampered meters naman ang agad na napalitan.
“Ang partnership na ito ay sumasalamin sa aming ibinahaging pasya na isulong ang kaligtasan ng publiko at tiyakin ang maaasahang serbisyo ng kuryente para sa aming mga customer,” pahayag ni Meralco COO Ronnie L. Aperocho.
“As partners in nation-building, patuloy naming susuportahan ang mga inisyatiba na tumutulong sa pagtatayo ng mas ligtas at mas matatag na mga komunidad.”
About the Author
