Pinigilan ng Manila Regional Trial Court ang pag-alis ng bansa nina Senator Jinggoy Estrada, dating Public Works Secretary Manuel Bonoan, at ilang dating opisyal ng DPWH matapos magpalabas ng precautionary hold departure order o PHDO si Presiding Judge Juan Rañola Jr. ng Branch 52.
Bukod sa dalawang matataas na opisyal, saklaw rin ng kautusang may petsang Pebrero 10 ang mga dating opisyal na sina Roberto Bernardo, Gerardo Opulencia, at Henry Alcantara, na una nang kinilala ng Department of Justice bilang mga state witnesses sa malawakang anomalya sa flood control projects.
Ayon sa desisyon ng korte na isinapubliko nitong Lunes, Pebrero 16, mayroong sapat na basehan o probable cause upang maniwala na maaaring lumabas ng Pilipinas ang mga respondent upang takasan ang imbestigasyon at posibleng pag-aresto.
Ang kautusang ito ay nag-uutos sa Bureau of Immigration na agad isama ang kanilang mga pangalan sa Hold Departure List habang gumugulong ang mga reklamo sa ilalim ng National Bureau of Investigation.
Nagmula ang nasabing legal na hakbang sa mga reklamong plunder, direct bribery, at paglabag sa Anti-Graft and Corrupt Practices Act na isinampa laban sa mga opisyal.
Nadawit si Senator Estrada sa iskandalo matapos lumabas ang mga alegasyon na naglaan ito ng P355 milyong pondo para sa mga proyekto sa Hagonoy at Malolos, Bulacan noong 2025 kapalit ng umano’y tatlumpung porsyentong kickback o SOP.
Samantala, si Bonoan naman ay isinama sa imbestigasyon base sa rekomendasyon ng Independent Commission for Infrastructure para sa kaukulang aksyon ng Office of the Ombudsman.
Nilinaw naman ni DOJ Spokesperson Prosecutor Polo Martinez na bagama’t mayroon nang PHDO, patuloy pa rin ang kanilang preliminary investigation sa mga naturang reklamo.
Ang hakbang na ito ay bahagi lamang ng proseso upang matiyak na mananatili sa bansa ang mga sangkot habang hinihintay ang pormal na resolusyon ng kaso.
About the Author
