Matapos ang halos dalawang dekadang paghahanap ng hustisya, ipinag-utos na ng Court of Appeals (CA) na magbayad ng humigit-kumulang ₱136.3 milyon (US$2.36 milyon) ang mga may-ari ng dating Sulpicio Lines Inc. (SLI), ngayon ay Philippine Span Asia Carrier Corporation (PSACC), sa mga pamilya ng higit 800 kataong nasawi sa Princess of the Stars ferry tragedy noong Hunyo 21, 2008.
Sa desisyon ng CA, pinanindigan nitong may matinding kapabayaan ang mga opisyal ng PSACC, sa kabila ng babala ng masamang panahon dulot ng Bagyong Fengshen. Ang nasabing trahedya ay naganap sa karagatan ng Romblon, kung saan lumubog ang Ro-Pax ferry na sakay ang higit 850 katao.
Ayon sa ulat, umabot sa 814 ang kumpirmadong nasawi, habang mahigit 50 katao ang hindi na natagpuan kahit pinalawig ang search and rescue operations hanggang 2010.
Kabilang sa mga inakusahan ng reckless imprudence resulting in multiple homicide, damage to property, and serious physical injury sina Enrique Go, Eusebio Go, Carlos Go, Victoriano Go, Dominador Go, Ricardo Go, Edward Go, at Edgar Go—mga opisyal at may-ari ng kumpanya.
Nagbigay rin ang korte ng ₱800,000 (US$14,000) bilang kompensasyon sa bawat isa sa apat na nakaligtas sa insidente, bilang pagkilala sa pinsalang pisikal at emosyonal na kanilang dinanas.
Tinangka ng kampo ng Sulpicio Lines na igiit na ang insidente ay dulot umano ng “fortuitous event” o hindi inaasahang kalamidad, ngunit iginiit ng CA na hindi ito sapat na dahilan upang makaiwas sa pananagutan.
“Ang mga may-ari ay nagpakita ng malinaw na kapabayaan sa pamamalakad at pagkabigong gumawa ng desisyong maaaring naka-iwas sana sa trahedya,” saad ng korte.
Tinuligsa rin ng CA ang pagtatangkang isisi ng mga akusado sa PAGASA, sa pagsasabing walang ebidensyang sumusuporta sa umano’y kapabayaan ng ahensya ng panahon.
Ang desisyong ito ay isang makasaysayang hakbang patungo sa hustisya para sa mga biktima ng pinakamalalang maritime disaster sa kasaysayan ng Pilipinas sa modernong panahon.
About the Author
