Tuluyan nang binawi ng Philippine National Police (PNP) ang lahat ng lisensya ng baril ng gaming tycoon na si Charlie “Atong” Ang bilang bahagi ng mas pinalakas na manhunt operation laban sa kanya.
Kinumpirma ni Criminal Investigation and Detection Group (CIDG) Director Maj. Gen. Robert Alexander Morico II sa isang press briefing sa Quezon City nitong Huwebes na inaprubahan na ng Chief PNP ang kanilang rekomendasyon na kanselahin ang mga nasabing lisensya.
Ayon sa rekord ng pulisya, mayroong anim na rehistradong baril sa ilalim ng pangalan ni Ang, at nakipag-ugnayan na ang CIDG sa kanyang mga abogado upang iutos ang agarang pagsuko ng mga armas na ito sa Firearms and Explosives Office.
Ang hakbang na ito ng PNP ay kasunod ng inilabas na warrant of arrest ng Santa Cruz, Laguna Regional Trial Court Branch 26 nitong Miyerkules laban kay Ang at 17 iba pa para sa kasong kidnapping.
Ang nasabing kaso ay may kaugnayan sa misteryosong pagkawala ng mga sabungero na hanggang ngayon ay hindi pa rin natatagpuan.
Sa kasalukuyan, si Ang na lamang ang nananatiling malaya matapos madakip at mapasakamay ng CIDG ang lahat ng kanyang 17 kasamahan sa hapon din ng araw na inilabas ang warrant.
Sa kabila ng mga hakbang na ito ng awtoridad, kinuwestiyon naman ng abogado ni Ang na si Gabriel Villareal ang naging kautusan ng korte.
Ayon kay Villareal, ang direktiba para sa pag-aresto sa gaming tycoon ay maituturing na “premature” at may mga kaduda-dudang aspeto pagdating sa usaping legal.
Gayunpaman, nananatiling aktibo ang operasyon ng kapulisan upang matunton ang kinaroroonan ni Ang at maisilbi ang warrant of arrest para sa nasabing non-bailable na kaso.
About the Author
