Mindoro Tamaraws, Nagwagi Laban sa Muntinlupa Cagers; Rizal Tinalo ang Imus

Pola, Oriental Mindoro — Umabante ang Mindoro Tamaraws sa kanilang kampanya sa Maharlika Pilipinas Basketball League (MPBL) 2025 Season matapos talunin ang Muntinlupa Cagers, 94-76, noong Sabado, Hunyo 21, sa Pola Gymnasium sa Oriental Mindoro.

Pinangunahan ng beteranong si Joseph Sedurifa ang Tamaraws sa kanilang pag-angat sa ikaapat na yugto ng laro. Sa loob lamang ng ilang minuto, tumipa si Sedurifa ng dalawang sunod na three-point shots at isang lay-up upang ilayo ang Mindoro sa iskor na 92-70, may dalawang minuto na lamang ang nalalabi.

Nag-ambag si Wendelino Comboy ng 20 puntos, kabilang ang apat na three-pointers, at nagtala rin ng tatlong rebounds, dalawang assists, at dalawang steals. Malaking tulong din ang naging kontribusyon nina:

• Bambam Gamalinda – 18 puntos (4 three-pointers), 3 assists, 2 rebounds, 2 steals
• Axel Inigo – 13 puntos, 10 rebounds, 9 assists
• Ashlon Andrews – 8 puntos, kabilang ang isang two-handed slam dunk, 4 rebounds, 2 assists

Sa kabila ng mga pagsisikap ng Muntinlupa na pamunuan ni Patrick Ramos (18 puntos, 8 assists, 4 rebounds), hindi nila napigilan ang momentum ng Tamaraws. Ang Muntinlupa ay bumagsak sa 10-6 habang ang Mindoro ay umangat sa 10-8.

Samantala, sa ikalawang laro ng triple-header, nagpakitang-gilas ang Rizal Xentromall Golden Coolers sa kanilang malupit na panalo kontra Imus Braderhood, 114-77.

Pinangunahan ni Michael Canete ang opensa ng Rizal na may 16 puntos at 6 rebounds. Si Neil Tolentino, na tinanghal na Best Player of the Game, ay nagdagdag ng 14 puntos at 3 rebounds. Nag-ambag din sina:

• Eric Camson – 15 puntos, 5 rebounds, 2 assists
• Alwyn Alday – 10 puntos, 3 assists, 2 rebounds

Nagwagi ang Rizal sa pamamagitan ng dominating 52-32 rebounding edge at maagang paghila sa iskor, 50-37, sa pagtatapos ng first half. Bumaba sa 7-10 ang Imus sa kabila ng 18 puntos ni Mark Doligon, 14 puntos ni Kint Ariar, at 14 puntos ni Ryusei Koga.

Sa unang laro, naitala ang 20-0 na panalo ng Pangasinan Heatwaves laban sa Bacolod Tubo Slashers matapos hindi bumalik sa court ang Bacolod sa ikalawang kalahati. Ayon sa Technical Head na si George Magsino, ipinatupad ang FIBA rule na nagtatakda ng automatic forfeit score kung hindi magpatuloy sa laro ang isang koponan.

Nais sanang gamitin ng Bacolod ang kanilang mga bagong players, ngunit nabigong makumpleto ang kinakailangang dokumento bago ang laro. Dahil dito, bumagsak sa 2-13 ang kanilang rekord, habang ang Pangasinan ay umangat sa 10-5.

Ang mga laro ay bahagi ng pagdiriwang ng pista ng bayan ng Pola sa Hunyo 24. Isa sa mga nanood ng laban ay si Mayor at team owner ng Mindoro Tamaraws, Jennifer “Ina Alegre” Cruz.

Nakatakda ang susunod na triple-header ng MPBL 2025 sa Lunes, Hunyo 24, sa Cuneta Astrodome:

• 4:00 PM: Manila vs Caloocan
• 6:00 PM: Quezon City vs Abra
• 8:00 PM: Pasay vs General Santos

Ang MPBL 2025 ay patuloy na nagsusulong ng kompetitibong basketball sa iba’t ibang panig ng bansa, habang binibigyang-daan ang lokal na talento at pagsuporta sa komunidad. (RON TOLENTINO)