Pinas, Top 1 sa ‘Most Dangerous Countries’ – HelloSafe

MANILA — Sa isang pag-aaral na inilabas ng international comparison platform na HelloSafe, tinukoy ang Pilipinas bilang pinaka-delikadong bansa sa buong mundo para sa mga biyahero ngayong 2025.

Ayon sa nasabing ulat, ang Singapore ang nanguna bilang pinakaligtas na bansa sa Asia at pumangalawa sa buong mundo, kasunod ng Iceland. Sa kabilang dulo naman ng listahan, ang Pilipinas ang nasa huling puwesto — hindi lang sa Asia, kundi sa buong mundo — na may safety score na 82.32, mas mataas (at mas delikado) pa kaysa sa Colombia (79.21) at Mexico (78.42).

Sinuri ng HelloSafe ang natural disasters, karahasan sa lipunan, armed conflicts, healthcare infrastructure, at militarization. Ang bawat bansa ay binigyan ng puntos base sa panganib, kung saan ang mas mababang score ay mas ligtas. Ang maximum points ay 100.

Narito ang top 5 pinakaligtas:

1. Iceland – 18.23
2. Singapore – 19.99
3. Denmark – 20.05
4. Austria – 20.31
5. Switzerland – 20.51

At ang bottom 5 pinakadelikado:

1. Philippines – 82.32
2. Colombia – 79.21
3. Mexico – 78.42
4. India – 77.86
5. Russia – 75.65

Southeast Asia Rankings

• Malaysia – 36.92 (Safe)
• Vietnam – 51.33 (Not Very Safe)
• Thailand – 52.39 (Not Very Safe)
• Indonesia – 72.94 (Dangerous)

Ang Singapore lamang ang tanging non-European country na pasok sa top 5.

Pilipinas: Bakit Delikado?

Bagamat hindi detalyado ang ulat sa partikular na dahilan ng mababang ranggo ng Pilipinas, posibleng nakaapekto ang mataas na insidente ng kalamidad, karahasan, kakulangan sa serbisyong pangkalusugan, at militarisasyon.

Ayon sa HelloSafe, layunin ng pag-aaral na bigyang-linaw ang kalagayan ng seguridad sa mga bansa, at hindi ang pagiging “tourist-friendly” ng mga ito.

Dahil sa alarming na ranggo ng Pilipinas, inaasahang masusuri ng pamahalaan at mga ahensyang responsable sa seguridad at turismo ang mga datos upang mapaigting ang mga hakbang na makapagliligtas hindi lamang sa mga turista kundi sa mismong mamamayan.

“Hindi sapat ang magandang tanawin at magiliw na tao kung delikado naman ang kalagayan sa kalye, sa kalikasan, at sa kalusugan,” ani ng isang analyst sa sektor ng turismo.