BI: Hindi lahat ng alien tourist ay makapasok sa PH na walang visa simula Feb. 10

Nilinaw ng Bureau of Immigration (BI) na tanging ang mga dayuhan lamang na ganap na nabakunahan mula sa mahigit 150 bansang nakalista sa isang executive order ang maaaring makapasok sa Pilipinas nang walang visa simula sa Pebrero 10.

Sa isang advisory, sinabi ni BI Commissioner Jaime Morente na ang mga dayuhan na ang bansang nasyonalidad ay hindi nakalista sa ilalim ng Executive Order No. 408 ay hindi maaaring maka-avail ng visa-free privilege, kaya kinakailangan silang kumuha ng visa bago maglakbay sa Pilipinas. 

Sa ilalim ng nasabing EO, ang mga mamamayan mula sa 157 bansa ay maaaring makapasok sa bansa nang walang visa para sa initial stay ng 30 araw.

Kabilang sa mga nasabing bansa ang Canada, Japan, Singapore, USA, New Zealand, Malaysia, at South Korea.

Sinabi ni Morente na ang mga dayuhang turista mula sa mga bansang hindi nakalista sa ilalim ng EO 408 ay kailangang kumuha ng 9(a) visa at entry exemption document (EED) sa pamamagitan ng alinman sa mga embahada o konsulado ng Pilipinas sa ibang bansa.

“Dapat din fully vaccinated sila o kung hindi, hindi sila makapasok kahit na mayroon silang valid na 9(a) visa at EED,” dagdag niya.

Binigyang-diin ng BI chief na lahat ng dayuhang papasok sa bansa ay kinakailangang magpakita ng kaukulang patunay ng full vaccination na itinakda ng IATF o kung hindi ay ibabalik sila sa mga paliparan at mai-book sa unang available na flight sa kanilang pinanggalingan.

Ipinaliwanag naman ni Morente na ang mga dating Pilipinong kuwalipikadong mag-avail ng one-year Balikbayan privilege ay dapat ding ganap na mabakunahan bago sila makapasok sa bansa.

Ang Balikbayan program ay nagpapahintulot sa mga dating Pilipino, kabilang ang kanilang dayuhang asawa at mga dependent na kasama nila sa paglalakbay, na makapasok sa bansa nang walang visa sa loob ng isang taon.

Ipinasiya din ng IATF na ang mga dumarating na dayuhang turista ay kinakailangang magpakita ng negatibong RT-PCR test, na kinuha ng hindi bababa sa 48 oras bago sila umalis mula sa kanilang bansang pinanggalingan, isang return ticket, isang pasaporte na may bisa ng hindi bababa sa 6 na buwan, at isang travel at health insurance para sa Covid-19 na may minimum coverage na US$35,000 na valid sa buong duration ng kanilang pananatili.