Dalawang minor na estudyante, kabilang ang mismong gunman, ang kumpirmadong patay matapos ang nangyaring pamamaril sa loob ng junior high school campus ng Ateneo de Zamboanga University sa Barangay Tumaga ngayong Martes ng umaga, Agosto 18, 2026.
Nagdulot ng malaking takot sa lungsod ang insidente kung saan nag-aabang sa labas ng paaralan ang daan-daang nag-aalalang mga magulang.
Batay sa ulat ng pulisya, naganap ang pamamaril dakong 7:45 AM nang pumasok ang suspek sa Room 404 at barilin ang isang 10th-grade student na agad nitong ikinamatay.
Pagkatapos ng pamamaril, mabilis na tumakbo pababa sa ikatlong palapag ang suspek, sumigaw sa mga tao, at kasunod na binaril ang kaniyang sarili gamit ang dala nitong 9mm na baril.
Isiniwalat ni Bureau of Customs (BOC) Chief Ariel Nepomuceno na ang baril na ginamit sa sinasabing premeditated attack ay galing sa kanilang ahensya at inisyu sa ama ng suspek na nagsisilbing commander ng Enforcement and Security Service sa Port of Zamboanga.
Agad namang sinibak sa pwesto ang ama habang nagpapatuloy ang imbestigasyon ng Philippine National Police (PNP) sa pangunguna ni Gen. Melencio Nartatez Jr.
About the Author
