Arestado ang dalawang Iranian national na tumangay sa pera ng tindero ng isda at gulay sa isinagawang follow-up operasyon ng pulisya sa Caloocan City.
Sa kanyang ulat kay Northern Police District (NPD) Acting Director P/BGen. Christopher Dela Cruz, sinabi ni Caanyloocan Police Chief P/Col. Joey Goforth na nangyari ang insidente Sabado ng alas-5:30 ng hapon nang lapitan ng isa sa dayuhan ang 35-anyos na vendor na abala sa pagtitinda sa Reparo Road, Brgy. 161.
Nagtanong umano ang dayuhan sa wikang English ng tungkol sa salapi ng bansa kaya ipinakita ng biktima ang kanyang pera sa loob ng bag at hinayaan pang kunin ng suspek ang bag niya pero nang ibalik ay wala na ang P7,000 dahilan upang habulin niya ang patakas na dayuhan, kasama ang hiningan ng tulong na opisyal ng barangay.
Subalit, hindi nila naabutan ang suspek nang sumakay sa naghihintay na sasakyang minamaneho ng kasabuwat kaya’t humingi ng tulong ang vendor sa Sta Quiteria Police Sub-Station 6 na agad ding nagsagawa ng follow-up operation na nagresulta sa pagkakadakip sa mga suspek sa bahagi na ng Baesa sa naturang lungsod.
Nakumpiska sa 50-anyos na Iranian ang kinulimbat na pera ng biktima na kabilang sa nakumpiskang iba’t-ibang uri ng lokal at dayuhang salapi habang na-impound din ang ginamit nilang sasakyan sa pagtakas na minaneho ng 25-anyos niyang kababayan.
“This incident shows that when the public and the police work together, criminals have little room to escape. Hindi natin hahayaang masayang ang pinaghirapan ng ating mga kababayan,” pahayag ni PNP Acting Chief PLTGEN Jose Melencio C. Nartatez Jr. nang makarating sa kaalaman niya ang nangyari. (JUVY LUCERO)
About the Author
