Sa halip na tuluyang iwan ang collegiate ranks, pinatunayan ni Nina Ytang na may misyon pa siyang dapat tapusin sa University of the Philippines.
Matapos ang tatlong magkakasunod na parangal bilang UAAP Best Middle Blocker, mas pinili ng 5-foot-11 standout na manatili sa Diliman para sa kanyang huling taon sa kabila ng mga alok na mag-professional na katulad ng kanyang kasamahan na si Nica Celis.
Ayon kay Ytang, ang kanyang mga coach, teammates, at kapwa seniors na sina Irah Jaboneta at Joan Monares ang nagsilbing inspirasyon niya upang ituloy ang laban.
Layunin ng kanilang grupo na iwanang maganda ang resulta ng season para sa State U bago sila tuluyang magtapos sa liga.
Ang paninindigang ito ay nagbunga sa isang kahanga-hangang reverse sweep ng UP laban sa defending champion National University, 16-25, 16-25, 25-22, 31-29, 18-16, nitong Sabado.
Pinunuan ni Ytang ang depensa ng Fighting Maroons sa pamamagitan ng pitong blocks mula sa kabuuang 19 na blocks ng koponan, na naging susi upang makuha ang panalo matapos maiwan sa unang dalawang set.
Dahil sa tagumpay na ito, umakyat ang UP sa 3-1 record, kapantay ang Lady Bulldogs at nakabuntot sa wala pang talong La Salle. Inamin ni Ytang na hindi naging madali ang simula ng laro dahil sa mababang kumpyansa mula sa nauna nilang pagkatalo, ngunit nanaig ang kanilang determinasyon na magpakita ng gilas sa court.
Bitbit ang katagang “Atin ‘to” na pinasikat noon ni Paul Desiderio sa men’s basketball, buo ang tiwala ni Ytang na ito na ang tamang panahon para sa Lady Maroons.
Target ng koponan na wakasan ang isang dekadang pagkawala sa Final Four at ituloy ang pag-akyat ng programa sa volleyball sa tulong ng puspusang trabaho at paniniwala sa kanilang kakayahan. (RON TOLENTINO)
About the Author
