Kuha ang larawan mula sa PDEA Calabarzon
NALANSAG ng pinagsanib na puwersa ng Philippine Drug Enforcement Agency (PDEA) at Philippine National Police (PNP) ang isang hinihinalang clandestine shabu laboratory sa Barangay Macamot, Binangonan, Rizal kagabi, Disyembre 9, 2025.
Ayon sa ulat, bandang alas-11:40 ng gabi nang isilbi ang search warrant ng mga operatiba mula sa PDEA Regional Office 4A Special Enforcement Team 1 at 2, PDEA Rizal Provincial Office, PDEA Intelligence Service, PDEA Cyber and Information Technology Service (CITS), PNP Provincial Intelligence Team Rizal, Binangonan Municipal Police Station, at Rizal Police Provincial Office sa tirahan ng mga suspek sa Lot 2 Block 2, Montalban St. corner Anonuevo St sa nasabing lugar.
Kabilang sa mga nakumpiska ang 80 puting plastic gallon na may likidong hinihinalang CPECS; 25 plastic bottle na may label na “Molasses;” 5 plastic bottle na may likidong hinihinalang CPECS; humigit-kumulang 10 kilo ng ephedrine; 15 round white plastic bottles na may likidong hinihinalang CPECS; humigit-kumulang 10 kilo ng puting powdered substance; humigit-kumulang 200 gramo ng puting crystalline substance na hinihinalang shabu; humigit-kumulang 10 kilo ng brownish powdered substance; 3 sako ng white crystalline substance; 2 sako ng brownish powdered substance; isang malaking green container na may likidong hinihinalang CPECS at iba’t ibang drug paraphernalia, kagamitan, at apparatus.
Ayon sa mga imbestigador, ang clandestine laboratory ay pinaniniwalaang pinatatakbo ng isang well-organized group ng mga foreign national na may mga kasabwat na Filipino.
Patuloy ang imbestigasyon, at inihahanda na ang kasong paglabag sa Section 8 (Manufacture of Dangerous Drugs and/or Controlled Precursors and Essential Chemicals), Article II ng Republic Act 9165 laban sa mga target ng search warrant. (Arnold Pajaron Jr)
About the Author
