Ipinagtanggol ni Senador Robin Padilla si dating Commission on Elections (Comelec) Commissioner Rowena Guanzon matapos masangkot ito sa isang mainitang sagutan sa loob ng isang mall sa Makati, na kumalat sa social media nitong Lunes.
Sa isang Facebook post, sinagot ni Padilla ang mga netizen na bumabatikos kay Guanzon matapos itong makitang sumisigaw at nagmumura sa isang hindi pa nakikilalang lalaki at babae, matapos umano siyang pagsabihan ng lalaki dahil sa kanyang pag-ubo.
Ayon kay Padilla, mali ang naging asal ng lalaki lalo na’t nakatatanda si Guanzon.
“”Pilipino daw hindi Tsino ang sumita kay Atty. Guanzon sa mall. Eh ‘di mas lalong katangahan ang pumanig ka sa Pinoy na ‘yan! Senior citizen si Atty.! Nasa batas natin ang pag-aalaga at paggalang sa senior citizen. Magpasalamat nga dapat ang Pinoy na ‘yan at hindi naatake o nadisgrasya dahil high-blood si Atty. sa kawalang modo niya. Anong klaseng Pinoy yan?! Pagka-Pilipino natin ang paggalang sa matanda at pag-aruga, hindi sitahin mo at palabasin dahil umubo.”
May batas tayo na nag-aatas na alagaan at igalang ang mga nakatatanda. Dapat pa ngang magpasalamat ‘yung Pilipinong ‘yun at hindi siya sinaktan, dahil high-blood na ang abogada sa ginawa niyang kabastusan,” ani Padilla.
Dagdag niya, bahagi ng kulturang Pilipino ang paggalang at pag-aaruga sa mga nakatatanda, at hindi ang pagsigaw o pagpapaalis sa kanila dahil lamang sa pag-ubo.
Ginamit pa ng senador ang sarili bilang halimbawa, sinasabing matagal na siyang bina-bash at kinukuwestiyon ni Guanzon, pero nananatili ang kanyang paggalang dahil sa edad at karanasan nito.
“Wala kaming political alliance. Batas ito at pagiging Pilipino,” giit ni Padilla.
“Huwag kumilos nang kasing-hangal dahil lang sa politika. Matanda ang abogada — igalang.”
Binanggit din ng senador ang ilang batas na nagbibigay-proteksyon sa mga senior citizen, kabilang ang Republic Act 7432 o Senior Citizens Act.
Samantala, sinabi ni Guanzon na nakapaghain na siya ng reklamo laban sa naturang lalaki para sa unjust vexation at grave oral defamation. (Boyet Barba Jr)
About the Author
