Opisyal nang inilunsad ng Samsung ang kanilang pinakabagong mga flagship devices sa ikalawang Unpacked event nito para sa taon noong Miyerkules, Hulyo 9.
Tampok sa event ang bagong henerasyon ng kanilang foldable phones — ang Galaxy Fold7 at Galaxy Flip7 — pati na rin ang pinakabagong bersyon ng kanilang smartwatch, ang Galaxy Watch8, na ngayon ay may kasamang Google Gemini AI.
Malaking pagbabago sa Fold7
Itinuturing na isa sa pinakamalaking upgrade sa Fold series, ang Galaxy Fold7 ay may mas manipis at magaan na disenyo kumpara sa naunang Fold6. Bukod dito, mayroon na itong 200MP main camera, mula sa 50MP ng nakaraang modelo, at bagong 10MP front camera para sa cover screen.
Gamit ang bagong Snapdragon 8 Elite for Galaxy chipset, layon ng Fold7 na mapanatili ang performance habang binabawasan ang bigat at kapal ng device. Ang presyo ay nagsisimula sa P112,990.
Mas pino at AI-powered ang Flip7
Ang Galaxy Flip7 naman ay may mas malaking 4.1-inch FlexWindow display at mas manipis na bezel, na nagbibigay ng mas elegante at modernong hitsura. Mayroon din itong mas mahabang battery life (4,300mAh) at tumitimbang ng 188 gramo lamang kapag nakatiklop.
Isa rin sa mga highlight ay ang pag-access ng Gemini Live AI sa front screen — isang malaking hakbang mula sa dating Samsung Bixby. Ang presyo ng Flip7 ay nagsisimula sa P70,990, habang ang mas abot-kayang bersyon nitong Flip7 FE ay nasa P56,990.
Galaxy Watch8: Smartwatch na may health features at AI
Ang Galaxy Watch8 ang kauna-unahang smartwatch ng Samsung na may kasamang Google Gemini AI, kapalit ng Bixby. Bukod sa mga karaniwang fitness tracking features, maaari na rin nitong masukat ang antioxidant levels sa katawan — isang indikasyon ng bitamina at mineral sa katawan ng isang user.
Mas manipis at mas maliwanag din ang Watch8, na may mas matagal na battery life. Nagsisimula ang presyo nito sa P20,990 para sa base model, habang ang Watch8 Classic ay aabot ng P29,990.
About the Author
