Tuwing Oktubre, nakikiisa ang buong mundo sa Breast Cancer Awareness Month, isang pandaigdigang kilusan hindi lamang para palaganapin ang kaalaman, kundi para rin magligtas ng buhay sa pamamagitan ng maagang pagsusuri at patas na akses sa gamutan.
Ngayong 2025, ang temang pinili ng World Health Organization (WHO) ay “Every story is unique, every journey matters,” isang paalala na sa likod ng bawat diagnosis ay may personal na kuwento ng tapang, pakikibaka, at pag-asa.
Hindi maikakaila na ang breast cancer ang pinakakaraniwang uri ng cancer sa kababaihan sa buong mundo. Noong 2022, tinatayang 2.3 milyong kababaihan ang na-diagnose at 670,000 ang nasawi. Ngunit malinaw rin ang hindi pagkakapantay-pantay: sa mayayamang bansa, higit 90% ang survival rate dahil sa maagang detection at maayos na gamutan. Sa India, bumababa ito sa 66%, at sa South Africa, 40% na lang.
Ayon sa WHO, kung magpapatuloy ang ganitong trend, tataas ng 40% ang kaso at pagkamatay dahil sa breast cancer pagsapit ng 2050. Kaya’t inilunsad nila ang Global Breast Cancer Initiative (GBCI) na may 60-60-80 strategy: 60% ng kaso madetect sa early stage, diagnosis sa loob ng 60 araw mula sa unang sintomas, at 80% ng pasyente ay matatapos ang tamang gamutan.
Dito sa Pilipinas, breast cancer ang isa sa nangungunang sanhi ng pagkamatay ng kababaihan kung saan 32 Filipina ang namamatay kada araw. Sa kabila ng mga kampanya, nananatiling huli ang pagkaka-detect lalo na sa mga liblib at kapos-palad na komunidad.
Mabuti na lamang at maraming organisasyon ang kumikilos. Kabilang dito ang Philippine Cancer Society (PCS) na may ACT NOW (Access to Cancer Treatment Now) campaign. Sa pamamagitan ng mobile screening services, mahigit 18,000 katao na ang nasuri. Mayroon din silang 30-Day Screening to Treatment model na nagpapabilis ng proseso mula diagnosis hanggang gamutan, kasabay ng Patient Navigation Program na gumagabay sa pasyente sa bawat yugto ng laban.
Hindi rin magpapahuli ang ICanServe Foundation na may programang Ating Dibdibin para sa maagang detection at diagnosis, kaagapay ng data infrastructure na tumutulong sa LGUs sa cancer care, kasabay ng pagpapatupad ng National Integrated Cancer Control Act (NICCA).
Sa harap ng napakalaking hamon, malinaw na hindi ito kaya ng gobyerno lamang. Kinakailangan ang pagtutulungan ng public-private partnerships, ng mga eksperto sa kalusugan, at ng bawat indibidwal upang matiyak na ang bawat Pilipina ay may patas na laban sa sakit na ito.
Habang ginugunita natin ang Breast Cancer Awareness Month, huwag nating kaligtaan ang diwa ng tema na “Every story is unique, every journey matters.” Ang bawat kuwento ng survivor ay dapat ipasa, upang magsilbing inspirasyon para sa maagang pagpapatingin at maagap na gamutan.
Walang Filipina ang dapat maiwan sa laban kontra breast cancer.
About the Author
