DINAMPOT ng pulisya ang isang caretaker ng isang fishpond matapos tutukan ng baril at pagbantaang papatayin ang sinita niyang babae na nagtapon ng tissue paper sa Valenzuela City.
Ayon kay Valenzuela Police Sub-Station 5 Commander P/Capt. Doddie Aguirre, sinampahan na ng ksong Grave Threat at paglabag sa Comprehensive Law on Firearms and Ammunition ang suspek na si alyas “Jeffrey”, 25, ng Brgy. Tagalag ng lungsod.
Sa kanyang ulat kay Northern Police District (NPD) Acting Director P/BGen. Benliner Capili, sinabi ni Valenzuela police chief P/Col. Joseph Talento na nangyari ang panunutok ng baril at pagbabanta sa biktimang si alyas “Lyn” 29, residente ng Brgy. Arkong Bato alas-4:30 ng Linggo ng hapon.
Lumabas sa imbestigasyon na nakita umano ng suspek na nagtapon ang biktima ng tissue paper sa binabantayan niyang fishpond sa Tagalag Fishing Village, Rosal Street, Barangay Tagalag kaya sinita niya ang babae.
Pinagsabihan ng suspek si alyas Lyn na bawal ang ginawa niya dahil hindi aniya ito basurahan subalit, dinedma umano ito ng biktima na dahilan para tutukan siya ng baril at pagbantaang papatayin.
Sa takot ay nagtatakbo ang biktima hanggang makahingi ng tulong kina P/SSg Melvic Pingad at P/SSg Ricardo Santos Jr., kapwa nakatalaga sa SS5 na nagresulta sa pagkakadakip sa suspek at pagkakakumpiska sa isang kalibre .38 revolver na kargado ng isang bala.
About the Author
