Muling kumuha ng atensyon sa social media ang dating COA at COMELEC Commissioner na si Rowena Guanzon matapos nitong magbigay ng makahulugan at nakakatawang reaksyon sa isang viral meme na nagkukumpara kay Pangulong Ferdinand Marcos Jr. sa isang tanyag na anime character.
Sa kumakalat na meme, makikita ang larawan ng Pangulo na nakasuot ng fedora hat, salamin, makapal na coat, at pulang scarf habang naglalakad. Katabi nito ang isang ilustrasyon ng karakter na si Arsène Lupin III mula sa sikat na seryeng Lupin the Third, na tanyag sa kanyang pagiging “gentleman thief.”
Hindi pinalampas ni Guanzon ang pagkakataon na makisali sa katuwaan ng mga netizen. Sa kanyang online post, pabirong nagkomento ang dating komisyoner tungkol sa pagkakahawig ng dalawa.
“Sabi ko na eh… napanood ko na ito dati eh,” hirit ni Guanzon sa kanyang social media account.
Agad na umani ng samu’t saring reaksyon mula sa mga followers at netizens ang nasabing komento, kung saan marami ang natawa sa pagiging “witty” ng dating opisyal. Ang pagkukumpara kay PBBM sa karakter na si Lupin ay naging usap-usapan online dahil sa kakaibang porma ng Pangulo sa kanyang kasalukuyang biyahe sa ibang bansa, na nagkataong tumugma sa iconic na suot ng nasabing anime character.
Sa kabila ng mga seryosong isyu sa bansa, tila naging panandaliang “comic relief” para sa marami ang palitan ng biro at memes sa internet.
About the Author
