Nakapagtala ng panibagong kasaysayan ang Philippine peso matapos itong sumadsad sa pinakamababang antas nito laban sa dolyar nitong Lunes.
Ang paghina ng lokal na pera ay dulot ng muling pagsipa ng presyo ng krudo sa pandaigdigang pamilihan na lumampas na sa $100 kada bariles.
Tumapos ang palitan sa ₱59.50 kada dolyar, na mas mahina ng 50 sentimos kumpara sa huling pagsasara nito.
Higit itong mas mababa sa dating record low na ₱59.46 na naitala noong ika-15 ng Enero. Sa katunayan, umabot pa ang piso sa intraday low na ₱59.71 sa gitna ng matinding trading volume na pumalo sa $2.6 bilyon.
Ayon sa mga economic analysts, ang tumitinding labanan na kinasasangkutan ng Iran ang pangunahing mitsa ng kaba sa merkado.
Dahil dito, natatakot ang mga mamumuhunan sa posibleng mas malawak na inflation na dala ng enerhiya at ang paglabas ng mga kapital mula sa bansa (capital outflows).
Dahil ang Pilipinas ay isang import-dependent na bansa—lalo na sa supply ng langis—ang bawat pagtaas ng presyo ng krudo ay nagbibigay ng matinding pressure sa ekonomiya.
Nagbabala ang mga traders na kung mananatiling mataas ang presyo ng enerhiya sa mundo, posibleng magpatuloy ang pagdausdos ng halaga ng piso sa mga susunod na araw.
About the Author
