Binigyang-diin ni Executive Secretary Ralph Recto ang patuloy na suporta ng administrasyong Marcos sa mga lokal na pamahalaan sa ginanap na 2026 General Assembly ng League of Municipalities of the Philippines (LMP) nitong Marso 10 sa Marriott Hotel.
Bilang kinatawan ni Pangulong Ferdinand Marcos Jr., hinarap ni Recto ang mga alkalde at opisyal mula sa iba’t ibang bahagi ng bansa upang talakayin ang mga isyu sa lokal na pamamahala at suriin ang mga programa ng gobyerno na may direktang epekto sa mga komunidad.
Sa naturang pagtitipon, nagpaabot ng pasasalamat ang LMP, sa pamumuno ni National President Mayor Faustino “Inno” Dy V, para sa paglulunsad ng Local Government Support Fund (LGSF).
Ang pondong ito ay nagsisilbing direktang tulong pinansyal para sa mga munisipalidad upang pondohan ang mga proyektong imprastraktura, palakasin ang serbisyo publiko, at isulong ang mga programang pangkaunlaran sa grassroots level.
Ayon kay Recto, ang LGSF ay isang mahalagang bahagi ng pangako ng Pangulo na paigtingin ang kapasidad ng mga LGU at gawing mas epektibo ang paghahatid ng serbisyo sa mga mamamayan.
Bilang bahagi ng kanilang pakikipagtulungan sa pambansang pamahalaan, pormal ding inihain ng LMP kay Recto ang kanilang mga policy recommendations tungkol sa iminumungkahing reporma sa Local Government Code.
Ang mga rekomendasyong ito ay naglalayong gawing mas moderno at angkop ang mga batas sa kasalukuyang pangangailangan ng mga bayan, habang patuloy na sinisiguro ang pag-unlad ng bawat munisipalidad sa ilalim ng gabay ng administrasyong Marcos.
About the Author
