Sa isang makasaysayang hakbang, pormal nang sinimulan ng Kamara nitong Martes ang deliberasyon sa mga panukalang batas na naglalayong ipagbawal ang mga political dynasty sa bansa.
Layunin ng mga pagdinig na ito na bigyang-buhay at sa wakas ay maipatupad ang probisyon ng 1987 Constitution na matagal nang nakabinbin at hindi nabibigyan ng kaukulang batas.
Pinangunahan ng House Committee on Suffrage and Electoral Reforms, sa ilalim ng pamumuno ni Lanao del Sur 1st District Rep. Zia Alonto Adiong, ang pagsusuri sa mga naturang bill.
Ayon kay Speaker Faustino “Bojie” Dy III, matagal na itong hinihintay ng publiko at tiniyak niya ang katapatan ng Kamara sa pagtalakay sa isyung ito.
Binigyang-diin ni Dy na halos 40 taon na ang nakalipas mula nang pagtibayin ang Saligang Batas, ngunit hanggang ngayon ay kulang pa rin ito ng enabling law na magtitiyak ng pantay na pagkakataon sa serbisyo publiko.
Ang hakbang na ito ay bahagi ng mas malawak na repormang demokratiko na tinukoy ni Pangulong Ferdinand R. Marcos Jr. bilang isa sa mga prayoridad sa huling pulong ng Legislative-Executive Development Advisory Council (LEDAC).
Kabilang sa mga isinasalang sa pagsusuri ay ang House Bill No. 6771 na inihain nina Speaker Dy at Majority Leader Ferdinand Alexander “Sandro” Marcos.
Inilarawan naman ni Rep. Adiong ang pagdinig bilang “historic” at isang mapagpasyang hakbang para tuparin ang pangako ng Konstitusyon.
Nilinaw niya na ang inisyatibong ito ay hindi pag-atake sa mga pamilya o indibidwal, kundi isang paraan para itaguyod ang mga prinsipyo ng demokrasya at tugon sa hiling ng mamamayan para sa tunay na reporma.
Inaasahang magpapatuloy ang mga konsultasyon sa mga eksperto sa batas at iba pang mga stakeholder upang makabuo ng isang matibay na batas na tutugon sa pangangailangan ng bansa.
About the Author
