Muling nalagay sa katanungan ang kakayahan ng administrasyong Marcos sa pagtugis at pagpapauwi sa mga pugante matapos lumabas ang mga kalituhan sa tunay na kalagayan ni dating Ako Bicol Representative Zaldy Co.
Isang linggo matapos ang anunsyo ng pagkakadakip sa dating mambabatas sa Czech Republic noong Abril 16, inamin ni acting Department of Justice Secretary Fredderick Vida na wala pa silang hawak na tiyak at beripikadong impormasyon kung nasaan na ito sa kasalukuyan.
Ayon kay Vida, ayaw niyang magbigay ng mga ispekulasyon na maaaring humantong sa disimpormasyon, at kinumpirma rin niya na walang garantiya kung nasa loob pa nga ng naturang bansa sa Europa ang dating mambabatas.
Sa gitna ng kawalan ng katiyakan sa lokasyon ni Co, nagkaroon din ng paglilinaw ang Department of Justice hinggil sa terminolohiyang ginamit ng gobyerno sa paghuli rito.
Ayon kay DOJ Spokesperson Prosecutor Rafael Martinez, hindi teknikal na arestado si Co kundi sumailalim lamang sa paghihigpit ng kalayaan o deprivation of liberty dahil sa isyu sa kanyang dokumento sa Czech Republic.
Inihalintulad ito ng kagawaran sa isang sitwasyon sa paliparan kung saan pinagkakaitan ng pagpasok ang isang indibidwal, na malayo sa unang impresyong ibinigay ng pamahalaan na ito ay isang ganap na pag-aresto para sa kanyang mga kinakaharap na kasong malversation at graft.
Bagama’t tila nagkaroon ng pagkakaiba sa mensahe, pinanindigan ng Malacañang sa pamamagitan ni Undersecretary Claire Castro na walang kontradiksyon sa mga pahayag ng Pangulo at ng DOJ.
Paliwanag ng Palasyo, ang pagkakadakip kay Co ay bunsod ng kawalan ng maayos na dokumento at hindi direkta mula sa warrant of arrest ng Pilipinas.
Gayunpaman, kapansin-pansin na binago ng Presidential Communications Office ang kanilang naunang ulat kung saan pinalitan ang salitang “arrest” ng “custody” upang tumugma sa bagong naratibo ng kagawaran ng katarungan.
Hanggang sa kasalukuyan, nananatiling mailap ang pag-asang mapaharap agad sa hustisya si Zaldy Co para sa alegasyong korapsyon sa flood control projects sa Oriental Mindoro.
Sa kabila ng pangako ni Pangulong Marcos na mapapauwi ang dating mambabatas sa lalong madaling panahon, nananatiling bigo ang gobyerno na magbigay ng konkretong update sa proseso ng pagpapabalik sa kanya.
Ang insidenteng ito ay nagsisilbing paalala sa publiko sa tila mabagal at magulong sistema ng pagpapauwi sa mga malalaking pangalan na nahaharap sa mga kaso ng katiwalian sa bansa.
About the Author
