Binigyang-diin ng mga batikang peryodista ang kahalagahan ng pagsunod ng mga kabataang manunulat sa yapak ng mga kagalang-galang na mamamahayag, mula sa panahon ni Marcelo H. del Pilar hanggang sa kasalukuyang panahon ng social media kung saan talamak ang fake news.
Ito ang naging pangunahing mensahe sa ginanap na “Usapang Plaridel: Campus Journalism Lecture Series” sa E. Rodriguez Jr. High School sa Quezon City, kung saan 90 mag-aaral ang nabigyan ng mahahalagang kaalaman tungkol sa industriya.
Nagbahagi ng kanilang kasanayan sina Nelson Cuartero ng Manila Bulletin, Lito Cinco ng People’s Tonight, Frederick Nasiad ng Manila Times, at Benjie Alejandro ng Abante Radio upang himukin ang mga kalahok na pangalagaan ang kanilang kredibilidad at panindigan ang mga tradisyunal na prinsipyo ng pamamahayag.
Tinalakay ng mga eksperto ang iba’t ibang larangan kabilang ang pagsulat ng balita, lathalain, balitang pampalakasan, at radio broadcasting sa buong araw na aktibidad na inorganisa ng Association of Philippine Journalists-Samahang Plaridel Foundation, Inc. sa pamumuno ni Evelyn Quiroz.
Bahagi rin ng programa ang panayam ni Jonathan Gesmundo ukol sa buhay at mga akda ni Del Pilar sa La Solidaridad bilang pagbabalik-tanaw sa kasaysayan ng Philippine Journalism.
Bilang pagkilala sa suporta sa nasabing proyekto, ginawaran ng plake ng pasasalamat ang pamunuan ng paaralan sa pangunguna ni Principal Ernest Ferrer at ang ERJHS Alumni Association sa ilalim ni Ramon Ferreros.
Inaasahang magpapatuloy ang serye ng seminar-workshop sa New Era High School sa Pebrero 20 at sa Jose P. Laurel High School sa Marso 13.
Para sa mga paaralang nagnanais sumali, maaaring makipag-ugnayan sa tanggapan ni Samahang Plaridel project director Ed Andaya o Nelly Lumbaca sa kanilang opisina sa Ermita, Manila, o sa pamamagitan ng kanilang mga opisyal na numero ng telepono at email address. (Mina Paderna)
About the Author
