Mariing kinondena ni Quezon City Mayor Joy Belmonte ang naging pahayag ni 4th District Representative Jesus Manuel “Bong” Suntay sa isang pagdinig sa Kamara, na inilarawan ng alkalde bilang isang anyo ng “objectification” sa mga kababaihan.
Sa isang opisyal na pahayag nitong Miyerkules, Marso 4, 2026, nanawagan si Belmonte kay Suntay na humingi ng pormal na paumanhin at magkaroon ng pananagutan sa kanyang mga salita na binitawan sa gitna ng deliberasyon ng House Committee on Justice hinggil sa impeachment complaints laban kay Bise Presidente Sara Duterte.
Naging mitsa ng batikos ang ginamit na halimbawa ni Suntay noong Martes upang ipaliwanag na ang mga pribadong kaisipan o imahinasyon ay hindi dapat ituring na kriminal. Sa kanyang pahayag, binanggit ng mambabatas ang pagkakita niya sa aktres na si Anne Curtis sa isang establisyimento.
Ayon kay Suntay, nakaramdam umano siya ng “desire” at “init” nang makita ang aktres, ngunit binigyang-diin niya na hindi siya maaaring kasuhan dahil ito ay nanatili lamang sa kanyang imahinasyon. Ang nasabing komento ay agad na ipina-strike out sa record ng Kamara matapos umani ng pagtutol mula sa mga kapwa mambabatas dahil sa pagiging misogynistic at hindi angkop nito, lalo na’t kasalukuyang ipinagdiriwang ang Women’s Month.
Ipinahayag ni Mayor Belmonte ang kanyang pagkadismaya dahil si Suntay ay nagsilbing Majority Floor Leader ng Quezon City Council nang ipasa ang “Bawal Bastos Ordinance” at ang Gender and Development Code ng lungsod.
“His words directly contradict the spirit of empowerment that we have worked hard to build here in Quezon City. It is truly disappointing to witness Congressman Suntay’s casual display of objectification, on Women’s Month no less,” ani Belmonte.
Binigyang-diin ng alkalde na ang mga ganitong uri ng pananalita ay walang lugar sa isang sibilisadong diskurso, lalo na mula sa isang halal na opisyal na inaasahang magtataguyod sa dignidad ng bawat mamamayan.
Sa kabila ng panawagan, naglabas na ng pahayag si Rep. Suntay kung saan humingi siya ng paumanhin sa mga nasaktan, ngunit iginiit na “walang malisya” ang kanyang ginamit na analohiya.
Ayon sa kongresista, nais lamang niyang ipakita ang punto na ang mga hindi maipapatupad na pahayag at kaisipan ay hindi sapat na basehan para sa isang impeachable offense.
Gayunpaman, nananatiling matatag ang posisyon ni Mayor Belmonte at ng iba pang sektor na ang pananagutan ng mga opisyal sa kanilang pananalita ay hindi dapat ikompromiso.
About the Author
