Inanunsyo ni Kris Aquino na siya ay sasailalim sa anim na buwang preventive isolation upang ipagpatuloy ang gamutan laban sa kanyang 11 sakit, kabilang ang siyam na pangunahing autoimmune diseases at iba pang komplikasyon.
Sa isang Instagram post nitong Agosto 11, sinabi ng 54-anyos na television host at aktres na matagal siyang hindi nagbahagi ng update dahil patuloy na nadadagdagan ang kanyang autoimmune diseases at lumalala ang ilang malubhang karamdaman.
Ayon kay Aquino, halos dalawang buwan siyang nanatili sa isang pribadong beach property na pag-aari ng isang pamilyang tumulong sa kanya upang makapagpalakas ng katawan at pananampalataya. Sa nalalapit na linggo, sasailalim siya sa isang anim hanggang walong oras na infusion ng isa sa pinakamalakas na immunosuppressants, kasabay ng dalawa pang gamot — isa na iniinom araw-araw at isa na ini-injection — na magpapababa ng kanyang immune system.
Bilang bahagi ng kanyang gamutan, mananatili siya sa compound ng pamilya Cojuangco sa Tarlac hanggang matapos ang taon.
Ipinaliwanag din ni Aquino na ang kanyang panganay na anak na si Joshua ay pansamantalang naninirahan sa kanyang pinsan dahil sa trauma matapos makita ang kalagayan ng ina. Samantala, pinasalamatan niya ang kanyang bunsong anak na si Bimby, na aniya’y nagsisilbing inspirasyon upang patuloy siyang lumaban.
Nagpasalamat si Aquino sa kanyang medical team mula sa Makati Medical Center at St. Luke’s BGC, kabilang ang mga doktor, nurse, at technician, sa patuloy na pagbibigay ng pangangalaga.
Nilinaw rin niya na wala siyang cancer, taliwas sa ilang haka-haka, at ipinaliwanag ang kondisyon ng kanyang autoimmune diseases, kabilang ang lupus, rheumatoid arthritis, at Sjögren’s syndrome.
“Mahal ko ang aking mga anak at hindi pa sila handang mawala ako — lalo na si Bimb na kaka-18 pa lamang. Kaya’t tuloy ang laban,” wika ni Aquino sa pagtatapos ng kanyang pahayag.
About the Author
