Kinumpirma ni Senate President Pro Tempore Panfilo Lacson na inirerekomenda na ng draft report ng Senate Blue Ribbon Committee ang pagsasampa ng kasong plunder, graft, at iba pang kaukulang paratang laban nina Senador Francis “Chiz” Escudero, Joel Villanueva, at Jinggoy Estrada kaugnay ng mga umano’y maanomalyang flood control projects.
Ayon kay Lacson, ang nasabing draft ay sinimulang ikalat noong Pebrero 3 at orihinal na nilagdaan nina Senador Juan Miguel Zubiri, JV Ejercito, Win Gatchalian, Risa Hontiveros, Bam Aquino, at Kiko Pangilinan.
Gayunpaman, kaagad ding binawi nina Zubiri, Ejercito, at Gatchalian ang kanilang mga pirma sa dahilang kailangan pa nila ng karagdagang panahon upang masusing mapag-aralan ang nilalaman ng dokumento.
Ipinaliwanag ni Lacson na sa ilalim ng mga panuntunan ng Senado, kinakailangan ang hindi bababa sa labing-isang lagda mula sa kabuuang dalawampung miyembro ng Blue Ribbon Committee upang maging opisyal ang ulat at maari itong isalang sa deliberasyon sa plenaryo.
Sa kabila ng pag-atras ng ilang kasamahan, nananatiling matatag si Lacson sa mga natuklasan ng ulat at binigyang-diin na ang mga inirerekomendang kaso ay tumutugma sa mga kasalukuyang preliminary investigation na isinasagawa na sa labas ng Senado.
Dagdag pa ng senador, ang draft report ay binuo ng mga abogado ng komite sa ilalim ng gabay ni dating Deputy Ombudsman for Luzon Gerard Mosquera, kaya naman handa siyang pasanin ang buong responsibilidad sa anumang nilalaman nito.
About the Author
