Pormal nang nagsampa ng kasong kriminal ang National Bureau of Investigation (NBI) laban sa dating broadcast journalist na si Jose Yumang Sonza, mas kilala bilang Jay Sonza, at ang content creator na si Jefrey “Ka Eric” Celiz.
Ang hakbang na ito ay nag-ugat sa isang targeted cyber-surveillance operation na isinagawa ng NBI-Cybercrime Division noong Enero 2026, kung saan tinukoy ang dalawa bilang mga pangunahing pinagmulan ng maling impormasyon tungkol sa kalusugan ni Pangulong Ferdinand Marcos Jr.
Ayon sa imbestigasyon, ginamit ni Sonza ang kanyang Meta-verified Facebook account habang sa YouTube channel naman ni Celiz ipinoste ang mga video na naglalayong maghasik ng duda sa kakayahan ng Pangulo na gampanan ang kanyang tungkulin.
Batay sa dokumentasyon ng NBI noong huling bahagi ng Enero, kumalat ang mga online posts na naglalaman ng isang CT-scan report kasabay ng mga larawan ng Pangulo upang igitna ang hinalang may “deterioration” o paglubha sa kanyang medikal na kondisyon.
Bagama’t kalaunan ay binura o nilimitahan ang akses sa mga orihinal na Facebook posts, matagumpay na naseguro ng NBI ang mga ebidensya gamit ang digital forensic screenshots at sa pamamagitan ng pagsubaybay sa mga repost at sipi na patuloy na kumakalat sa iba’t ibang platform.
Ang mga video sa YouTube channel ni Celiz ay nakitaan din ng mga pahayag na nagpapalakas sa mga maling claim na ito, na kwinwestiyon ang “fitness for duty” ng Punong Ehekutibo base sa mga hindi beripikadong dokumento.
Dahil sa mga nakalap na ebidensya, inirekomenda ng NBI na usigin sina Sonza at Celiz para sa paglabag sa Section 4(c)(4) ng R.A. 10175 o ang Cybercrime Prevention Act of 2012 para sa Cyber Libel.
Bukod dito, maaari rin silang harapin ang kasong Unlawful Use of Means of Publication sa ilalim ng Article 154 ng Revised Penal Code na may kaugnayan sa Section 6 ng nasabing batas.
Ang operasyong ito ng NBI ay kasunod ng naging pahayag ng Malacañang na nagaatas ng malalimang pagsisiyasat matapos mag-viral ang isang pekeng medical report na nagsasabing kailangang sumailalim sa operasyon ang Pangulo dahil sa sakit na diverticulitis.
Sa kasalukuyan, wala pang inilalabas na pahayag ang kampo nina Sonza at Celiz hinggil sa mga alegasyon habang patuloy naman ang pakikipag-ugnayan ng NBI sa iba pang ahensya, kabilang ang PNP Anti-Cybercrime Group, upang matukoy ang lahat ng mga responsable sa paglikha at pagpapakalat ng mga pekeng bulletin na ito.
Ang insidenteng ito ay nagsisilbing babala mula sa mga otoridad laban sa paggamit ng social media sa pagpapakalat ng mga impormasyong maaaring magdulot ng kalituhan sa publiko at banta sa katatagan ng pamahalaan.
About the Author
