Tahasang ipinahayag ni Baguio City Mayor Benjamin Magalong na panahon na upang tuluyang buwagin ang Independent Commission for Infrastructure (ICI) matapos itong malumpo dahil sa sunod-sunod na pagbibitiw ng mga opisyal nito at kawalan ng suporta mula sa sangay na ehekutibo.
Ang ICI ay binuo bilang isang investigative body na naglalayong siyasatin ang mga alegasyon ng korapsyon sa mga flood control projects at malalaking proyektong pampubliko.
Ayon kay Magalong, na nagbitiw noong Setyembre bilang special adviser ng komisyon, hindi na epektibo ang ICI dahil wala na itong sapat na tauhan at awtoridad upang gampanan ang kaniyang tungkulin.
“Maganda ang intensyon, pero hindi gagana ang isang komisyon kung wala na itong mga miyembro at suporta,” pahayag ni Magalong sa panayam ng programang ‘The Newsmaker.’ “Sa puntong ito, hindi na ito viable.”
Sumang-ayon ang mga pahayag ni Magalong sa naging kritisismo ni dating Senate President Franklin Drilon, na naunang naglarawan sa ICI bilang isang “patay na katawan” (dead body). Ayon kay Drilon, naglaho na ang pag-iral ng komisyon para sa anumang praktikal na layunin.
Sa kasalukuyan, iisang opisyal na lamang ang natitira sa komisyon—si dating Justice Andres Reyes—dahilan upang maging imposible ang pagpapatakbo rito bilang isang collegial body o ang pagsasagawa ng mga makabuluhang imbestigasyon.
“Hindi lamang ito ‘lame duck,’ tumigil na ito sa pag-iral,” ani Drilon. “Isa na itong patay na katawan, hindi na ito makakakilos.”
Matatandaang ilang matataas na opisyal na ang lumisan sa ICI nitong nakaraang taon, kabilang ang dating Public Works Secretary na si Rogelio Singson, na nagbitiw dahil sa kalusugan, at si Commissioner Rossana Fajardo.
Binigyang-diin ni Magalong na sa halip na panatilihin ang lumpong komisyon, mas mainam na palakasin ang mga permanenteng institusyon ng gobyerno para sa pagpapanagot sa mga tiwali.
“Ang mga anti-corruption efforts ay dapat naka-angkla sa matitibay at permanenteng institusyon. Kung hindi, ang tiwala ng publiko ang magdurusa,” pagtatapos ni Magalong.
About the Author
